Vann sitt fyrsta risamót ári eftir að hún íhugaði að hætta

Þegar Opna breska meistaramótið í golfi hófst á Royal Troon-vellinum í Skotlandi var Sophia Popov í 304. sæti heimslista kvenna. Hin 27 ára gamla Popov var aldrei talin líkleg til að landa sigri á mótinu og það sem meira er, hún var nærri hætt að slá golfkúlur fyrir aðeins ári síðan.

Snemma á síðasta ári greindist Popov með Lyme-sjúkdóminn. Sjúkdómurinn veldur hita, höfuðverk, útbrotum og þreytu. Stuttu áður hafði Popov aðeins verið höggi frá því að tryggja sér sæti á LPGA-mótaröðinni. 

Þarna breyttist allt á örskömmum tíma.

„Ég er fegin að ég hafi komist í gegnum þetta allt saman. Ég vissi að ég gæti þetta og ég er glöð að ég gafst aldrei up. Ég var nærri hætt að spila fyrir ári síðan, guð sé lof að ég gerði það ekki,“ sagði Popov eftir sigur helgarinnar.

Þegar LPGA-mótaröðin hófst að nýju eftir fimm mánaða hlé þá var Popov mætt á svæðið en þó ekki sem kylfingur. Hún var kylfuberi fyrir Anne van Dam en þær eru vinkonur.

Segja má svo að kórónufaraldurinn hafi hjálpað Popov að komast í hæstu hæðir. Sökum dræmrar þátttöku á Marathon Classic-mótinu í Toledo í Kanada í byrjun ágúst fékk Popov að taka þátt. Hún lauk leik í 9. sæti og fékk í kjölfarið þátttökurétt á Opna breska meistaramótinu.

Þar gerði hún sér svo lítið fyrir og vann mótið. Þar með hefur hún tryggt sér keppnisrétt á LPGA- sem og evrópsku mótaröðinni næstu árin.