Formaður foreldrafélags segir deiluaðila í sandkassaleik

Samningaviðræður Eflingar og Reykjavíkurborgar fara nú fram á tveimur vígstöðvum. Annars vegar á mjög stopulum og árangurslausum fundum hjá Ríkissáttasemjara og hins vegar í fjölmiðlum þar sem Sólveig Anna Jónsdóttir formaður Eflingar og Dagur B. Eggertsson borgarstjóri skiptast á yfirlýsingum. Þar takast þau á um hvað borgarstjóri hafi sagt og ekki sagt um mögulega lausn deilunnar.

Samkvæmt heimildum fréttastofu bauð borgarstjóri Sólveigu Önnu til fundar með tölvupósti í gær sem enn hafi ekki verið svarað. Sólveig Anna skrifar hins vegar á Facebook síðu borgarstjóra í morgun þar sem hún setur tvö skilyrði fyrir því að hitta hann.

Að borgarstjóri birti opinberlega tilboð sem samninganefnd Eflingar hafi verið kynnt á samningafundi hjá ríkissáttasemjara hinn 19. febrúar, sama dag og borgarstjóri ræddi málin í Kastljóssviðtali, þannig að allir geti borið tilboðið saman við ummæli borgarstjóra í ríkissjónvarpinu.

Þá krefst Sólveig þess að borgarstjóri mæti henni eða öðrum fulltrúa Eflingar í útvarps- eða sjónvarpsviðtali fyrir vikulok áður en að fundi þeirra geti orðið.

Verkfallið hefur nú staðið í sextán daga og greinilegt að það er farið að reyna á þolrifin hjá mörgum foreldrum leikskólabarna. Margrét Vala Gylfadóttir formaður foreldrafélags leikskólans Hlíðar segir óásættanlegt að setja börn og foreldra í þessa stöðu á sama tíma og ekki séu haldnir samningafundir og deiluaðilar talist ekki við.

„Við náttúrlega förum fram á að þau sýni okkur þá virðingu að tala saman við samningaborðið. Þar sem þessi samtöl eiga heima. Þannig að þér finnst það ekki líklegt til lausnar að borgarstjóri og formaður Eflingar skiptist á yfirlýsingum í fjölmiðlum? Nei, það minnir nú helst á sandkassaleik leikskólabarna sem eru helstu þolendurnir í þessari deilu,” segir Margrét.

Skorar félagið á samninganefndir Eflingar og Reykjavíkurborgar að sýna börnum og foreldrum þá virðingu að ganga af heilindum að samningaborðinu með það fyrir augum að samningar náist hið fyrsta.

Yfirlýsing frá foreldrafélaginu er hér fyrir neðan í heild sinni.

Yfirlýsing frá foreldrafélagi leikskólans Hlíðar vegna aðgerðaleysis í kjaradeilu Eflingar og Reykjavíkurborgar

Foreldrafélag leikskólans Hlíðar lýsir yfir vonbrigðum með gang viðræðna í kjaradeilu Eflingar og Reykjavíkurborgar. Fram hefur komið í fjölmiðlum að engar viðræður séu í gangi og vekur það furðu foreldra í félaginu. Foreldrar skilja ekki hvernig komast megi að samkomulagi ef deiluaðilar talast ekki við. Þeir hafa því áhyggjur af framhaldinu.

Í dag er sextándi dagur verkfallsins. Tæplega 70 börn á leikskólanum Hlíð hafa verið heima allan þann tíma og ekkert getað farið á leikskólann þar sem fjórar af sex deildum Hlíðar eru alveg lokaðar í verkfallinu. Á tveimur deildum þar sem tæplega 40 börn stunda nám hefur starfsemi verið verulega skert.

Börn á Hlíð eru orðin óþreyjufull eftir því að komast aftur á leikskólann. Mörg dæmi eru um börn sem mega illa við raskinu sem fylgir því þegar þeirra daglega líf fer úr skorðum og líður því illa vegna stöðunnar. Margir foreldrar eru kvíðnir og uppgefnir við að púsla deginum saman og eykur það enn frekar á vanlíðan barnanna.

Dæmi eru um foreldra sem hafa þurft að nota sumarfríið sitt en það mun setja þau í vanda þær fjórar vikur sem sumarlokanir leikskólans standa yfir. Hluti foreldra eru einnig í þeirri stöðu að vera tekjulausir í verkfallinu þar sem þeir hafa þurft að taka launalaust leyfi. Með sama áframhaldi geta margar barnafjölskyldur lent í vanda sem mun taka langan tíma að vinna úr.

Það er óásættanlegt að setja börn og foreldra í þessa stöðu meðan samningafundir eru ekki haldnir og deiluaðilar talast ekki við. Vinnubrögðin lýsa að mati foreldrafélagsins skilningsleysi á þeirri stöðu sem fjölskyldur eru í. Á sama tíma endurspegla þau virðingarleysi gagnvart börnum og foreldrum.

Foreldrafélag leikskólans skorar á samninganefndir Eflingar og Reykjavíkurborgar að sýna börnum og foreldrum þá virðingu að ganga af heilindum að samningaborðinu með það fyrir augum að samningar náist hið fyrsta.