Segist „að sjálfsögðu“ standa við tilboð sitt

Borgarstjóri harmar að ekki hafi gengið hraðar að ná samningum milli Reykjavíkurborgar og Eflingar. Hann telur það tilboð sem nú er á borðinu geta markað tímamótasamning með tugprósenta launahækkunum fyrir lægstlaunuðu hópana. Margumrætt tilboð hans í Kastljósi standi „að sjálfsögðu.“ Borgarstjóri vonast jafnframt til þess að Eflingarfólk verji orku sinni heldur í samningagerð fremur en „skeytasendinga“ í sinn garð.

Langþráðum fundi samninganefnda Eflingar og Reykjavíkurborgar var slitið í gær án samkomulags. Hurðum var skellt og fulltrúar samninganefndanna ruku út í fússi eftir þriggja klukkustunda árangurslitlar viðræður. Blammeringar gengu á báða bóga.

Efling lýsti margvíslegu skilningsleysi og taldi borgina vera að afveigaleiða fólk - „með gylliboðum í fjölmiðlum sem að borgarstjóri stígur fram með þegar honum virðist henta,“ eins og Viðar Þorsteinsson, framkvæmdastjóri Eflingar, sagði í samtali við fréttastofu eftir fund gærdagsins.

Sjá einnig: Vilja vita hvort borginni sé alvara með „Kastljóstilboð Dags B. Eggertssonar“

Samninganefnd borgarinnar svaraði um hæl með yfirlýsingu í gærkvöldi. Þar var tilboð borgarinnar útlistað og sagt það að meðaltali fela í sér rúmlega 30 prósenta launahækkun fyrir félagsmenn Eflingar. Aukinheldur feli það í sér styttingu vinnuvikunnar og fjölgun orlofsdaga. Nánari útlistun á tilboðinu má nálgast hér.

Dagur B. Eggertsson, borgarstjóri, hefur ýmislegt við atburðarásina að athuga. Fyrst og fremst vonist hann þó til þess að samningar náist og að það séu vonbrigði að samningaferlið gangi ekki hraðar. Hann segir þó erfitt að verjast þeirri hugsun að efnisleg umræða um samningagerð hafi þurft að líða fyrir átök og skotgrafaumræðu. „Ég vildi óska að sami kraftur væri settur í samningagerðina og ítrekað virðist fara í skeytasendingar í minn garð og samninganefndar borgarinnar,“ skrifar Dagur á Facebook-síðu sína.

Í þessu samhengi nefnir borgarstjóri það sem Viðar drepur á hér að ofan: Meint gylliboð Dags, sem hann er sagður hafa viðrað fyrst í Kastljósi í liðinni viku. Efling hefur sakað samninganefnd Reykjavíkur um að tefla fram öðru tilboði en það sem borgarstjóri kynnti í Kastljósi, gerði það til að mynda í yfirlýsingu í upphafi vikunnar.

Dagur blæs hins vegar á gagnrýni um gylliboð og að hann hafi reifað annað tilboð í sjónvarpssal en gert er við samningaborðið. „Að sjálfsögðu“ sé um sama tilboð að ræða.

„Tilboð borgarinnar myndi hækka meðal grunnlaun almennra starfsmanna á leikskólum úr 310 þús í 420 þús á mánuði. Ofan á þessar tölur koma álagsgreiðslur sem hafa verið greiddar á leikskólum og eiga að halda áfram og verða heildarlaun í lok samningstímans því 460 þús. á mánuði. Þetta er gott tilboð um mikla hækkun lægstu launa sem er hér með ítrekað. Fyrir ófaglærða deildastjóra á leikskóla úr röðum Eflingar myndu grunnlaun hækka í 520 þús. að meðaltali á mánuði. Með áðurnefndum álagsgreiðslum eru heildarlaun þessa hóps 572 þús á mánuði. Getur þetta verið skýrara?“ skrifar Dagur.

Færslu hans má sjá hér að neðan, en þar klykkir hann út með þeim orðum að borgin telji að samningstilboð sitt geti markað tímamótasamning. „Vil ég lýsa þeirri von að samningum náist sem allra fyrst.“