Raf­magns­laust frá Keldu­hverfi og austur á Bakka­fjörð

Rafmagnslaust er nú frá Kelduhverfi og austur á Bakkafjörð eftir að bilun kom upp á Kópaskerslínu rétt fyrir klukkan sjö í morgun.

Rafmagn er skammtað á Raufarhöfn og Þórshöfn með varaaflstöðvum en varaaflstöðin á Bakkafirði er biluð og því hefur ekki tekist að koma á rafmagni þar. Þá eru ekki varaaflsstöðvar á Kópaskeri, Kelduhverfi og Öxarfirði og því rafmagn alveg úti á þeim svæðum.

Samkvæmt upplýsingum frá RARIK er búist við að rafmagn verði komið aftur á um hádegið. Kalt hefur verið á svæðinu og eru íbúðarhús þar kynt með rafmagni. Það kólnar því fljótt í þeim ef rafmagn er úti í lengri tíma.