Áskorendabankar hin nýja tegund fjártæknibanka

Eva Björk Guðmundsdóttir, forstöðumaður Meniga og formaður Samtaka fjártæknifyrirtækja á Íslandi, segir Google og Apple á hraðleið inn í bankageirann og nýja banka fjártækninnar kallast áskorendabanka. 

Dæmi um slíka banka eru stafrænu bankarnir Monzo sem stofnaður var sem app árið 2015 en telur nú ríflega þrjár milljónir viðskiptavina og Revolut sem stofnaður var í desember 2018 en hefur nú þegar áunnið sér hylli viðskiptavina. 

Eva segir mikilvægt að starfsfólk í bönkum horfi jákvætt á breytingarnar sem framundan eru því fjártæknin muni skapa mörg ný störf. Að sama skapi þurfa bankarnir sjálfir að endurskilgreina hvað það er að vera banki í þessu nýja umhverfi

Nú þegar umræðan snýst um hraðar og fyrirséðar breytingar á bankakerfinu er ekki úr vegi að spyrja Evu Björk hvað fólk í bankakerfinu þarf að átta sig á þegar nýir tímar eru boðaðir eins og nú.

„Á þessum tímum er afar mikilvægt fyrir fólk í fjármálastarfsemi að vera opið fyrir breytingum, taka þeim fagnandi og nýta til þess að læra nýja færni og þar með stækka verkfæra kassann sinn. Ég hef verið að vinna með íslenskum bönkum undanfarin ár og ég verð að ég segja að mér finnst frábært að sjá hvað þetta hefur einmitt breyst mikið.En þessi breyting  á einnig við bankana sjálfa sem þurfa svolítið að endurskilgreina hvað það er að vera banki sem og aðlaga sig að nýju tækni- og samkeppnisumhverfi.“ 

Eva segir áskorendabanka hina nýju tegund banka sem fjártæknin er að gefa af sér og segir að ef bankarnir hreyfi sig ekki með breytingunum gæti farið svo að starfsfólkið þeirra leiti annað.

„Við erum þegar að sjá víðsvegar um Evrópu  fjártæknifyrirtæki eða áskorendabanka á borð við Monzo og Revolut eru að ryðja sér til rúms og tæknirisar eins Apple og Google eru á hraðleið inn í bankageirann sem koma til með að gjörbreyta landslaginu.  Ef bankarnir hreyfa sig ekki með breytingunum þá mun starfsfólk jafnvel á endanum snúa sér til þeirra sem ætla sér að verða leiðandi afl í fjármálageira framtíðarinnar.Það er því jafn mikilvægt fyrir bankann sem og fólkið sem að vinnur í þessum geira að mæta tæknibreytingum með jákvæðum og opnum hug.“

Þurfum frumkvöðla með stórar hugmyndir

Sem dæmi má nefna að bankar eru farnir að hjálpa viðskiptavinum sínum að halda utan um kolefnisfótspor sín

Eva Björk segir framtíðina afar bjarta í fjártæknigeiranum og þar muni mörg ný tækifæri skapast. Fólk eigi alls ekki að óttast að ný störf verði einungis til fyrir fólk með tæknimenntun.

Nú virðast uppsagnir í bönkum óhjákvæmilegar á næstu árum en hvernig blasir umhverfið fyrir þér varðandi spennandi störf í fjártækni og breyttum fjármálageira?

„Ég tel að framtíðin sé afar björt í fjártæknigeiranum. Fólk er farið að gera meiri og öðruvísi kröfur til þeirra sem þau treysta fyrir fjármálunum sínum og með breyttu lagaumhverfi eru líka að opnast tækifæri fyrir aðra en bara hefðbundna banka til að bjóða upp á fjármálaþjónustu. Fjártækni snýst ekki bara um sjálfvirknivæðingu heldur líka um að bjóða upp á nýjar vörur og þjónustur í takt við breytta tíma. Sem dæmi má nefna að bankar eru farnir að hjálpa viðskiptavinum sínum að halda utan um kolefnisfótspor sín.“

Tæknibreytingar verða til þess að sum störf hverfa en þær  jafnframt stuðla að því að verða til nýjar vörur og þjónusta sem aftur leiðir til nýrra starfa

Eru þetta störf sem kalla á að fólk hafi einhverja sérstaka menntun eða þekkingu á til dæmis upplýsingatækni og forritun?

„Upplýsingatækni mun eðlilega spila stórt hlutverk í fjártæknigeiranum. En það þarf líka frumkvöðla með stórar hugmyndir, þróa vörur til að gera hugmyndirnar að raunveruleika, fólk til að markaðssetja þær, selja, fjármagna, og svo framvegis. Samhliða því verður einnig enn meiri þörf fyrir mannlega færni eins og sköpun, leiðtogahæfni  og tilfinningagreind.

Það er því alls ekki svo að með aukinni tæknivæðingu séu aðeins tækifæri fyrir fólk með tæknimenntun. Það er einmitt lykilatriði þegar það er verið að þróa vörur eða þjónustu að blanda saman ólíku fólki með mismunandi bakgrunn til þess að ná sem bestum árangri.Fjórða iðnbyltingin er í senn ein helsta áskorun og eitt helsta tækifæri fyrirtækja þar sem tækni gjörbreytir samkeppnisumhverfinu. Tæknibreytingar verða til þess að sum störf hverfa en þær  jafnframt stuðla að því að verða til nýjar vörur og þjónusta sem aftur leiðir til nýrra starfa.“

Margt spennandi í gangi hjá íslensku bönkunum

Það verður gaman að fylgjast íslensku bönkunum á næstu misserum það að margir þeirra eru með spennandi verkefni í farvatninu sem að ég hlakka til að fylgjast með

Eva Björk starfar fyrir Meniga í Svíþjóð. Að hennar sögn eru íslensku bankarnir á svipuðum stað og bankar á Norðurlöndunum. 

Nú hefur þú starfað í Svíþjóð. Finnst þér Norðurlöndin komin lengra en við í breyttu viðhorfi eða þekkingu á þeim breytingum sem framundan eru í banka- og fjármálakerfinu?

„Ekkert endilega. Flestir bankar eiga það sameiginlegt að vera stórar stofnanir sem hreyfa sig hægt sama hvar þeir eru. Það má kannski segja að ógnunin sé orðin áþreifanlegri á stærri mörkuðum þar sem áskorendabankar eru þegar farnir að ryðja sér til rúms.

En þrátt fyrir hraða tækniþróun þá tekur tíma fyrir kerfisbreytingar, innviði sem og stefnu fyrirtækja að fylgja eftir. Margir bankar kjósa því að vinna með fjártæknifyrirtækjum á borð við Meniga sem gerir þeim kleift að hreyfa sig hraðar. Breytt umhverfi með aukinni tæknivæðingu á að sjálfssögðu ekki bara við um bankanna heldur teygir  anga sína í alla starfsemi. Sem dæmi  má nefna snjallkassa í matvörubúðum, tryggingaþjónustu og vefverslanir. 

Bankarnir i Norðurlöndum eru í sömu vegferð og íslensku bankarnir og að fá fást við mikið af sömu áskorununum. Það verður gaman að fylgjast íslensku bönkunum á næstu misserum það að margir þeirra eru með spennandi verkefni í farvatninu sem að ég hlakka til að fylgjast með.“

Í Atvinnulífi á Vísi í dag er fjallað um breytingar á banka- og fjármálageiranum á tímum fjártækni og sjálfvirknivæðingar.