Kína sakar Banda­ríkin um að ala á ótta

Kínversk yfirvöld saka Bandaríkin um að valda ofsahræðslu vegna viðbragða bandarískra yfirvalda við kórónaveirunni. Bandaríkin lýstu yfir neyðarástandi í heilbrigðismálum vegna veirunnar á föstudaginn var og hefur öllum erlendum farþegum sem hafa heimsótt Kína síðastliðnar tvær vikur verið neitað inngöngu í landið. Frá þessu er greint á vef breska ríkisútvarpsins.

Meira en 17 þúsund tilfelli af kórónaveirunni hafa verið staðfest í Kína og hafa 361 látist af völdum hennar. Utan landamæra Kína hafa meira en 150 verið greindir með veiruna og einn lést af völdum hennar á Filippseyjum.