Guðmundur um Rússana: Mjög krefjandi andstæðingur

Guðmundur Guðmundsson landsliðsþjálfari mun venju samkvæmt undirbúa lið sitt af kostgæfni fyrir leikinn gegn Rússum í kvöld.

„Rússar eru með tiltölulega ungt lið. Hávaxið lið sem er árásargjarnt í sínum sóknaraðgerðum. Það þarf gríðarlega einbeitingu á móti þeim því þeir geta átt það til að spila mjög langar sóknir,“ sagði Guðmundur.

„Þeir eru með hættulega skotmenn og góðan miðjumann sem og vinstri hornamann. Þeir eru krefjandi andstæðingur í okkar vörn.“

„Þeir eru stórir og sterkir í vörn og við þurfum að vera mjög klókir gegn þeim. Við verðum með ákveðið leikplan sem við förum yfir á æfingu.“