Strákarnir mættir eftir næturflug til Malmö | Myndir

Strákarnir okkar eru mættir til Malmö en ferðaplön þeirra breyttust snögglega í gær og þeir flugu frá Íslandi um miðnætti.

Morgunflugunum var öllum flýtt í gær vegna veðurs og HSÍ tefldi ekki á tvær hættur og sendi liðið af stað en það átti ekki að fljúga fyrr en 16.00 í dag.

Strákarnir flugu til Kaupmannahafnar og voru svo komnir yfir til Malmö nánast um leið og morgunmaturinn opnaði á hóteli liðsins. Þeir munu vafalítið reyna að hrista úr sér ferðaþreytuna í dag og fara yfir einhver atriði.

Fyrsti leikur þeirra hér í borg er svo á laugardag er Danir koma yfir brúna.