Sóttu fótbrotna konu í Reykjadal

Björgunarsveitarfólk frá Hveragerði sótti göngukonu sem fótbrotnaði í Reykjadal í hádeginu. Sexhjól voru notuð til þess að komast að konunni og flytja hana í sjúkrabíl á bílastæði fyrir neðan dalinn.

Konan var á göngu þegar hún hrasaði illa og fótbrotnaði, að því er kemur fram í tilkynningu frá Landsbjörgu. Björgunarsveitarfólk ásamt sjúkraflutningamönnum fóru á vettvang á sexhjólum. Búið var um konuna þannig að hægt væri að flytja hana um þriggja kílómetra leið niður að bílastæði þar sem sjúkrabíll beið.

Hún var komin um borð í sjúkrabíl einum og hálfum tíma eftir að útkall barst og var flutt til frekari aðhlynningar á sjúkrahús.