Óli Kristjáns: Tekur tíma hjá stærðfræðingum að finna lausnina en hún er oftast góð

Ólafur Kristjánsson, þjálfari FH, var nokkuð sáttur með stig sinna manna á Kópavogsvelli í gærkvöld. Lokatölur 3-3 í stórskemmtilegum leik en Ólafur hefði samt sem áður viljað stela stigunum þremur.

Ólafur kom til Kjartans Atla Kjartanssonar og Hjörvars Hafliðasonar eftir leik og ræddi um leikinn.

Sjá einnig: Umfjöllun og viðtöl: Breiða­blik 3-3 FH | Jafntefli niðurstaðan í skemmtilegum leik

„Ég hefði viljað setja hann í restina þegar við fengum dauðafæri. Vorum að verjast prýðilega nær allan leikinn en þetta var samt sex marka leikur, mikið sótt, mikið um færi og mikið fjör. Ég er samt mjög svekktur að hafa ekki nýtt færið sem datt fyrir okkur undir lok leiks.“

Ólafur var spurður út í hvað hann hefði sagt við lið sitt í hálfleik en eftir að FH komst yfir misstu þeir smá tökin á leiknum.

„Þegar maður upplifir leikinn á hliðarlínunni og er ekki búinn að sjá hann aftur þá er alltaf smá í móðu en mér fannst við ágætir fyrstu tuttugu mínútur leiksins að beina þeim í þau svæði sem þeir máttu fara í. Svo missum við pressuna inn á miðsvæðinu, þeir ná að skipta boltanum á milli kanta eins og þeir vilja gera. Við töluðum um það í hálfleik að þora að stíga upp á miðjumennina þeirra og leyfa frekar miðvörðum þeirra að bera boltann upp.“

„Hann hefur spilað mikið í vetur og staðið sig vel. Fannst við vera í brekku í Víkinni og vildi ekki setja hann inn á þá. Maður verður að velja réttu tímasetninguna til að setja unga leikmenn inn á. Hann átti ekki að vera í leikmannahópnum í dag, Pétur Viðarsson var í hóp en datt út seint í dag,“ sagði Ólafur aðspurður hvort það hefði þurft kjark til að setja hinn unga Loga Hrafn Róbertsson inn á völlinn í hálfleik.

Logi Hrafn er fæddur árið 2004.

„Mér finnst þetta brot,“ sagði Ólafur um fyrsta mark Blika en Oliver fór þá aðeins í bakið á Jónatani Inga, leikmanni FH.

„Ég sagði við Jónatan í hálfleik að ef hann fengi aftur svona högg þá ætti hann að láta sig detta yfir boltann og taka hann með höndum.“

„Mér fannst Atli standa sig mjög vel. Bara þessi hreyfing hjá honum í aðdraganda vítaspyrnunnar sem við fáum í leiknum. Það tekur tekur stundum tíma hjá stærfræðingum að finna lausnina en þá er hún góð,“ sagði Ólafur um frammistöðu gamla brýnisins Atla Guðnasnar sem vinnur sem stærðfræðikennari á daginn.

Þá hrósaði hann Þóri Jóhanni Helgasyni fyrir góða frammistöðu á miðjunni í kvöld.

Ólafur spurður út í af hverju hann hefði átt jafn erfitt með að leggja Breiðablik af velli eins og raun ber vitni.

„Breiðablik er með mjög gott lið. Þeir eru með frábæran framherja í Thomas Mikkelsen og frábært lið. Í fyrra og hitt í fyrra erum við sjálfir klaufar. Mögulega hef ég lært eitthvað af því. Kannski er ég eins og stærðfræðingarnir; lengi að taka við mér.“

„Þessi tími sem þú hefur venjulega fengið til að setja þau upp og drilla þau í t.d. varnarleik hefur ekki verið til staðar. Við hoppuðum inn í mótið beint eftir Covid,“ sagði Ólafur að lokum um tímabilið ár og allan þann fjölda af mörkum sem við erum að sjá í leikjum sumarsins.