Íslensk verkfræðistofa hannar jarðgöng fyrir Grænlendinga

Grænlendingar undirbúa núna eins kílómetra löng jarðgöng, - í landi sem er án þjóðvegakerfis. Og það sem meira er: Það er íslensk verkfræðistofa sem ráðleggur þeim að gera þetta, hannar líka göngin og býr til útboðsgögnin. Þetta kom fram í fréttum Stöðvar 2.

Við höfum áður sagt frá uppbyggingu nýrra íbúðahverfa í Nuuk. Svo ör er fólksfjölgunin að bæjaryfirvöld í höfuðstað Grænlands horfa nú til nýs byggingarlands á fögru nesi skammt sunnan við bæinn. Sá galli er hins vegar að landleiðin þangað liggur um snarbratta hlíð.

En það eru til önnur lausn til að gera nesið fagra að nýju úthverfi Nuuk; að grafa jarðgöng í gegnum fjallið. Þar kemur íslensk verkfræðistofa við sögu, Verkís, í samstarfi við dótturfélag sitt á Grænlandi.

„Þetta er svaka spennandi. Grænland er skemmtilegur staður og framandi. Þarna er mikið að gerast þarna í ýmsu. Það er mikil uppbygging í gangi í Grænlandi og verulega gaman að taka þátt,“ segir Haukur Þór Haraldsson, verkefnisstjóri Nuuk-jarðganga.

Verkís hefur unnið sem ráðgjafi þróunarfélags bæjayfirvalda við undirbúningsrannsóknir og frumhönnun ganganna. Athygli vekur að gert er ráð fyrir sérstökum göngu- og hjólastíg með öruggum aðskilnaði frá bílaumferð.

„Þetta er öflugur hópur sem starfar með okkur í Grænlandi. Hingað er síðan sótt þekking á sviðum sem þeir hafa ekki þar.“

Verkís reiknaði það út að göng í gegnum fjallið yrðu fjörutíu prósentum ódýrari heldur en vegur um fjallshlíðina, sem hefði kallað á dýrar öryggisráðstafanir vegna skriðuhættu í hlíðinni. 

Verkís er í raun að selja þekkingu.

„Jarðfræðiþekkinguna – þá sem kunna að gera göng. Arkitekta, landslagsarkitekta. Það er margskonar þekking sem þarf til. Við erum átta sem komum að því hérlendis. Þeir eru síðan fimm, Grænlendingarnir.“

Stefnt er að því að gangagerðin verði boðin út í sumar og henni lokið á þremur árum. Þetta verða þó ekki fyrstu bílagöngin í Nuuk því áður var búið að sprengja stutt göng í gegnum klett í miðbænum.

Haukur segir gaman að starfa með Grænlendingum að uppbyggingu.

„Ég veit nú reyndar fyrir persónuleg kynni af Grænlendingum að þeim þykir líka samstarfið við Íslendinga spennandi og velja það, ef það sé hægt,“ segir Haukur Þór Haraldsson hjá Verkís.

Hér má sjá frétt Stöðvar 2:

Sjá einnig: Nuuk er að stækka upp í 30 þúsund manna borg