Lagði 70 þúsund inn á svindlara fyrir síma sem aldrei barst

Dæmi eru um að fólk hafi lagt tugi þúsunda króna inn á netsvindlara, sem bjóða vörur til sölu sem aldrei berast. Einstaklingur í umdæmi lögreglu á Suðurnesjum millifærði 70 þúsund krónur inn á reiknings slíks svindlara en fékk aldrei farsímann sem samið var um. Þetta kemur fram í tilkynningu frá lögreglu.

Í tilkynningu varar lögregla við varasömum viðskiptum gegnum netið og bendir fólki á að fara varlega í þeim efnum, einkum við fólk sem það þekkir ekki. Tilkynningar hafi borist lögreglu undanfarnar vikur, þar sem fólk hefur greitt fyrir vöru sem það aldrei fær.

„Í þessum tilfellum hefur fólk keypt farsíma á netinu og „seljandinn“ hefur útbúið falsaða kvittun sem sýnir fram á að varan sé komin í póst og hafa þá kaupendur millifært talsverðar upphæðir inn á „seljandann“ eftir að hann sendir þeim ljósmynd af kvittuninni. Það getur verið varasamt að stunda viðskipti á netinu og viljum við hvetja fólk til að fara varlega í því og huga að því hvort allt sé eðlilegt við seljandann.“ 

Málin eru til rannsóknar hjá lögreglu á Suðurnesjum.