Facebook kaupir GIPHY

Fyrirtækið Facebook er að kaupa GIPHY, síðuna þar sem fólk deilir svokölluðum GIF-um. Salan gengur í gegn í dag og er verðið fyrir GIPHY 400 milljónir dala. Stórt myndasafn GIPHY verður sameinað Instagram og öðrum öppum Facebook og mun fólk geta nálgast myndirnar þar.

Þetta kemur fram í tilkynningu frá Faecbook. Þar segir að margir notendur Facebook viti þegar hvað GIPHY sé enda komi um helmingur allra notenda síðunnar í gegnum Facebook eða aðra miðla fyrirtækisins eins og Messenger og WhatsApp.

Vishal Shah, einn yfirmanna Facebook, segir að kaupin muni hafa lítil áhrif á síðuna sjálfa. Fólk muni áfram geta hlaðið upp GIF-um að' vild. hann segir að fyrirtækið muni þar að auki verja meira fé til þróunar tækninnar og að auðveldara verði að að nálgast GIF í gegnum miðla Facebook.