Fleiri deyja á dvalarheimilum en sjúkrahúsum á Bretlandi

Rúmlega 40 þúsund manns hafa nú dáið vegna Covid-19 á Bretlandi. Það er hæsta talan í Evrópu og eingöngu hafa fleiri dáið í Bandaríkjunum, eða minnst 80.684. Af þeim 40.011 sem hafa dáið á Bretlandi hafa nærri því tíu þúsund dáið á dvalarheimilum, samkvæmt umfjöllun Guardian, og hefur dauðsföllum þar fækkað hægar en dauðsföllum á sjúkrahúsum.

Ljóst er þó að dauðsföllum hefur farið fækkandi um landið allt.

Blaðamenn Reuter, sem hafa rýnt í tölfræðina á Bretlandi, segja að eldri borgarar Bretlands hafi setið eftir vegna áherslu ríkisstjórnar Boris Johnson, forsætisráðherra, á að verja sjúkrahús.

Vitnað er í starfsmann Hagstofu Bretlands sem segist ekki muna til þess að það hafi gerst áður að dauðsföll hafi verið fleiri á dvalarheimilum en á sjúkrahúsum og það hafi verið svo að undanförnu.

Miðað við tölur frá Johns Hopkins háskólanum hafa 30.739 dáið á Ítalíu, 26.744 á Spáni og 26.646 í Frakklandi. Það er þó ekki víst hvort þær tölur innihaldi dauðsföll á dvalarheimilum og heimilum vegna ósamræmis á milli opinberra talninga hvers ríkis fyrir sig.