Atli Már hrósar sigri í Guðmundar Spartakusar-málum

Atli Már Gylfason blaðamaður fagnar sigri í máli sem Guðmundur Spartakus Ómarsson höfðaði á hendur honum. Atli Már telur þetta mál nú að baki. Málinu var vísað frá Hæstarétti í morgun.

„Til að Guðmundur Spartakus geti fari áfram með málið þarf hann standa skil á 2,6 milljónum króna. Þar af er 1,6 milljón í málskostnað og síðan þarf hann að greiða mér milljón vegna málskostnaðar í héraði. Til þess að fara af stað aftur með þetta mál þarf Guðmundur Spartakus að inna af hendi 2,6 milljónir króna og ég held að það sé mjög ólíklegt.“

Atli Már ánægður með niðurstöðuna

Dómur sem var að falla nú í morgun í Hæstarétti markar endalok þess sem Atli Már kallar á þriggja ára baráttu fyrir réttlæti fyrir dómsstólum.

„Ég er hæstánægður með þessa niðurstöðu. Þetta, samt sem áður, er lítil sárabót fyrir fjölskyldu Friðriks Kristjánssonar sem hefur leitað hans ákaft í sex ár, eða frá árinu 2013 en þá hvarf hann í Suður-Ameríku.“

Málið sjálft er verulega óhugnanlegt en Atli Már greindi frá því á sínum tíma að ónefndur maður hélt á afskornu höfði Friðriks í plastpoka einhver staðar í Suður-Ameríku. Guðmundur Spartakus hefur haldið því fram að það megi túlka sem svo að um sig hafi verið að ræða, í fréttaflutningi Atla Más en því hefur lögmaður Atla Más hafnað.

„Fjölskylda Friðriks hefur allan þennan tíma reynt að hafa uppá Guðmundi Spartakusi Ómarssyni því fjölskyldan hefur talið hann búa yfir mikilvægum upplýsingum um hvarf Friðriks. En allan þennan tíma hefur hann ekki svarað fyrirspurnum fjölskyldunnar.“

Málið tekið mikið á

Guðmundur Spartakus kærði Atla Má sem var vann málið í héraðsdómi. Guðmundur Spartakus áfrýjaði og vann  þá málið fyrir Landsrétti. Gunnar Ingi Jóhannsson hæstaréttarlögmaður áfrýjaði þá fyrir hönd Atla Más til Hæstaréttar og nú stendur málið þannig að sögn Gunnars Inga að það er komið aftur á byrjunarreit. Og í raun gott betur því ef halda á áfram með málið verið Guðmundur Spartakus að reiða fram 2,6 milljónir króna.

„Hæstiréttur, sem er mekka réttarfars í landinu, vísar þessu frá þannig að það er ekki einu sinni á spilaborðinu. Við vorum ekki að vinna málið en tókst að fá því vísað úr réttarsölum. Þannig að þetta er mikill áfangasigur,“ segir Gunnar Ingi í samtali við Vísi. Hann segir að Guðmundi Spartakusi hafi ekki tekist að sýna undir rekstri þessa máls að hann ætti neinna hagsmuna að gæta, þá í þeirri merkingu að ekki sé hægt að draga þá ályktun að um hann sé að ræða í fréttaflutningi Atla Más.

Atli Már segir þetta mál, sem nú hefur velkst lengi fyrir dómsstólum, hafa tekið mikið á.

„Á mig og fjölskylduna sem hefur á þessum tíma þurft að þola hótanir og nafnlausar símhringingar. Samt ekkert á við það sem fjölskylda Friðriks hefur mátt ganga í gegnum. Ég get nú farið að snúa mér að einhverju öðru. Byrjaður aftur í blaðamennskunni á fullu og ég held áfram að fjalla um þetta mál og önnur sem eiga erindi við almenning,“ segir Atli Már sem nýlega var ráðinn til starfa á DV.