Milla Ósk úr Efstaleiti til aðstoðar Lilju

Milla Ósk Magnúsdóttir, sem undanfarin ár hefur starfað sem fréttamaður hjá RÚV, hefur verið ráðinn aðstoðarmaður Lilju Daggar Alfreðsdóttur, mennta- og menningarmálaráðherra. Hafþór Eide Hafþórsson, sem verið hefur aðstoðarmaður Lilju lætur af störfum.

Í tilkynningu frá mennta- og menningarmálaráðuneytinu segir að Milla Ósk hefji störf á morgun en síðastliðinn áratug hefur hún starfað hjá Ríkisútvarpinu, síðustu ár sem fréttamaður en áður sem aðstoðarframleiðandi frétta og dagskrárgerðarkona í útvarpi og sjónvarpi. Þá var hún varaformaður Félags fréttamanna á Ríkisútvarpinu.

Milla er með ML-próf í lögfræði frá Háskóla Reykjavíkur þar sem hún sérhæfði sig í fjölmiðlarétti, auk þess að leggja áherslu á persónuupplýsinga- og vinnurétt.

Hún mun hefja störf í ráðuneytinu þann 10. desember. Samhliða mun Hafþór Eide Hafþórsson láta af störfum, en hann hefur verið mennta- og menningarmálaráðherra til aðstoðar frá desember 2017.

Aðeins tvær vikur eru síðan greint var frá vistaskiptum annarrar fréttakona á RÚV. Sigríður Halldórsdóttir réð sig til starfa sem aðstoðarmann Guðmundar Inga Guðbrandssonar umhverfisráðherra. Sigríður hóf störf í dag.