Í beinni í dag: Grannaslagur í Þorlákshöfn

Keppt verður í Domino's deild karla í kvöld og er slagur Þórs Þorlákshafnar og Grindavíkur í beinni útsendingu á Stöð 2 Sport.

Þórsarar frá Þorlákshöfn eru í áttunda sæti deildarinnar eftir sex umferðir og Grindavík í því níunda.

Þór hefur unnið þrjá leiki og tapað þremur en Grindavík er aðeins komið með tvo sigra.

Heimamenn í Þorlákshöfn eru á smá sigurgöngu, hafa unnið tvo leiki í röð. Í síðustu umferð tóku þeir nýliða Fjölni og unnu þá 91-83 í Dalhúsum.

Grindavík mætti Stjörnunni í síðasta leik og tapaði fyrir þeim eftir að hafa unnið síðustu tvo þar á undan og þurfa þeir að komast aftur á sigurbraut.

Leikurinn hefst stundvíslega klukkan 19:15 og verður bein útsending á Stöð 2 Sport frá 19:05.

Upplýsingar um dagskrá og beinar útsendingar á sportrásunum má sjá á heimasíðu Stöðvar 2.