Fékk veiðarfæri í skrúfuna

Björgunarskipið Gísli Jóns á Ísafirði var kallað út um klukkan sex í kvöld vegna rækjuveiðiskips sem hafði fengið veiðafæri í skrúfuna og gat ekki siglt fyrir eigin vélarafli.

Tveir eru um borð í skipinu sem var við veiðar í Inndjúpinu en engin slys voru á fólki að því er fram kemur í tilkynningu frá Landsbjörgu.

Það tók áhöfnina á Gísla Jóns um einn og hálfan tíma að sigla inn Djúpið að rækjuveiðiskipinu, áhöfnin tók skipið í tog og er á leiðinni með það til Ísafjarðar.