Vilja að framkvæmdastjórn Reykjalundar víki og skipuð verði starfsstjórn

Sjúkratryggingar Íslands og Landlæknir ætla á næstunni að meta hvort Reykjalundur geti uppfyllt núverandi þjónustusamning. Yfirlæknir taugasviðs Reykjalundar segir að það verði ómöglegt þegar allar uppsagnir lækna hafa tekið gildi. 

Sjö ályktanir hafa verið sendar síðustu vikur vegna þess uppsagna stjórnenda og skipulagsbreytinga á Reykjalundi. Félag íslenskra endurhæfingarlækna gagnrýndi að stjórn SÍBS stýrði stofnuninni, Fagráð Reykjalundar lýsti yfir áhyggjum, Taugasvið biðlaði til heilbrigðisyfirvalda að grípa inn í stöðuna,

Hjúkrunarráð sagði mikilvægt að höggva á hnútinn, læknaráðið óskaði eftir að stjórn og stjórnendur létu af störfum, sálfræðingar ályktuðu á sömu nótum og í dag kom sambærileg ályktun frjá sjúkraþjálfunardeild stofnunarinnar.

Hér má sjá dagsetningar ályktananna og setningar orðrétt úr þeim: 

16. október Félag íslenskra endurhæfingarlækna

Áhugamannafélög og sjúklingasamtök ekki fallin til að stýra heilbrigðisstofnun.

21. október Fagráð Reykjalundar

Fagráð hefur miklar áhyggjur af teymisvinnu á Reykjalundi.

Fagráð lýsir einnig yfir áhyggjum af því að félagasamtök geti haft óskorað vald yfir rekstri stofnunarinnar og ógnað  faglegri starfsemi hennar.

24.október Taugasvið Reykjalundar

Við biðlum til Heilbrigðisyfirvalda að grípa strax inn í stöðuna á Reykjalundi.

25. október Hjúkrunarráð Reykjalundar

Það er á ábyrgð forstjóra og framkvæmdarstjórnar að höggva á hnútinn áður en skaðinn verður meiri og ekki aftur snúið.

28. október Ályktun læknaráðs Reykjalundar 

...brýn nauðsyn sé á að stjórn Reykjalundar láti þegar af störfum ásamt þeim stjórnendum sem hún hefur skipað.

29. október Sálfræðingar Reykjalundar

...framkvæmdastjórn Reykjalundar þurfi að víkja og stjórn SÍBS verði að hætta afskiptum af starfsemi Reykjalundar.

1. nóvember Sjúkraþjálfunardeild Reykjalundar

Í þessari grafalvarlegu stöðu teljum við nauðsynlegt að endurskoða ráðningar nýrra stjórnenda við stofnunina til að koma í veg fyrir frekari skaða. 

Reykjalundur er með þjónustusamning við Sjúkratryggingar Íslands sem greiðir tvo milljarða á ári til hennar. SÍ óskaði eftir svörum frá stjórn SIBS um hvort Reykjalundur gæti uppfyllt samninginn og fékk svör í dag. María Heimisdóttir er forstjóri Sjúkratrygginga Íslands. 

„Það sem við gerum næst er að við förum mjög rækilega yfir þessi gögn og við erum í mjög góðu samstarfi við embætti Landlæknis um þessa stöðu. Það sem við í raun tökum  ákvörðun um er hvort við treystum okkur til að viðhalda samningssambandi við þann sem veitir þjónustu á okkar vegum,“ segir María.  

 

Allir læknar nema þrír hafa sagt stöðum sínum lausum á stofnuninni. Guðrún Karlsdóttir yfirlæknir taugasviðs er meðal þeirra. Hún telur að Reykjalundur geti ekki sinnt sama hlutverki þegar þeir eru hættir sem verður þann 1. febrúar á næsta ári.

„Ég sé ekki alveg hvernig þjónustan á að halda áfram að óbreyttu. Þá tel ég að það verði erfitt að ráða inn nýja endurhæfingarlækna því það liggja ekki á lausu læknar með þessa sérþekkingu. 

Guðrún segir að fleiri starfstéttir á Reykjarlundi séu að íhuga uppsagnir vegna ástandsins. Aðspurð um hvað þurfi svo fólk dragi uppsagnir sínar til baka segir Guðrún: 

„Mögulega hætta einhverjir við uppsögn ef núverandi framkvæmdastjórn víkur og skipuð verður starfsstjórn yfir Reykjalundi,“ segir Guðrún.

Samkvæmt upplýsingum fréttastofu hefur stjórn SIBS samþykkt að skipa óháða starfsstjórn yfir Reykjalundi og verður hún valin af utanaðkomandi aðilum.

Vonast er til að hún taki við störfum í næstu viku.