Nýir stjórn­endur taka við á morgun

Nýr forstjóri og nýr framkvæmdastjóri lækninga taka við stjórnartaumunum á Reykjalundi á morgun. Ráðning forstjóra er einungis tímabundin eða þar til nýr forstjóri verður ráðinn. Til stendur að auglýsa stöðuna á næstu dögum.

Morgunblaðið segir frá þessu í dag en boðað hefur verið til starfsmannafundar í hádeginu á morgun.

Birgi Gunnarssyni forstjóra Reykjalundar var sagt upp 30. september og var þeirri uppsögn fylgt eftir með uppsögn Magnúsar Ólasonar, framkvæmdastjóra lækninga á miðvikudag. Mikil óánægja hefur verið með ákvörðun stjórnarinnar meðal starfsfólks á Reykjalundi.

Sveinn Guðmundsson, stjórnarformaður SÍBS og starfandi forstjóri Reykjalundar, sagði fyrir helgi að búið sé að ráða manneskju í stað Magnúsar sem sé mjög hæf.