Má búast við slyddu til fjalla á sunnudag og mánudag

Norðanátt verður ríkjandi að minnsta kosti fram undir miðja næstu viku. Í dag og á morgun er vindhraðinn meinlítill eða á bilinu 5-13 m/s. Með fylgir rigning eða súld á Norður- og Austurlandi, en þó hvorki samfelld né í miklu magni. Hitinn á þessum slóðum 5 til 10 stig. Sunnan heiða verður áfram sólríkt og hiti allt að 16 til 17 stig þar sem best lætur á Suðurlandi. Þetta kemur fram í hugleiðingu veðurfræðings á vef Veðurstofu Íslands.

Nú í morgunsárið er stór og mikil lægð með öflugu regnsvæði að færa sig yfir Bretlandseyjar og verður lægðin þar viðloðandi um helgina. Knattspyrnuunnendur munu ef til vill taka eftir vindi og/eða rigningu í svipmyndum frá leikjum helgarinnar á Englandi.

Spár gera ráð fyrir að afsprengi umræddrar Bretlandslægðar gerist óþægilega nærgöngult skammt norðaustur af Íslandi á sunnudag og mánudag. Þá er gert ráð fyrir að bæti í styrk norðanáttarinnar hjá okkur og aukist úrkoman norðanlands og einnig kólnar enn frekar. Það má semsagt búast við talsverðri rigningu norðanlands á sunnudag og mánudag, en slyddu eða snjókomu til fjalla með tilheyrandi vosbúð. Þeir sem hyggja á ferðalög um norðanvert hálendið og á fjöllum norðanlands ættu því að fylgjast vel með veðri og búa sig eftir aðstæðum.