Alvara í sambandinu þrátt fyrir 23 ára aldursmun

Heimildarmaður People segir samband leikarans Leonardo DiCaprio við hina 22 ára gömlu Camila Morrone vera meira en bara tímabil. Hún eyði miklum tíma á heimili hans og hafi fyrir löngu hitt foreldra leikarans.

23 ára aldursmunur er á parinu en Morrone er fædd árið 1997. Þau byrjuðu að stinga saman nefjum snemma árs 2018 og hafa síðan þá verið nánast óaðskiljanleg.

Fyrr á árinu birti Reddit notandi mynd þar sem farið var yfir fyrrverandi kærustur leikarans og aldur þeirra. Svo virðist sem leikarinn haldi sig við ákveðinn aldur en síðustu tuttugu ár hefur engin kærasta hans verið eldri en 25 ára, þó svo að aldur hans fari hækkandi.

Meðalaldur kvennanna er 22,9 ár en sú yngsta var Gisele Bündchen. Þau byrjuðu að hittast árið 1999 þegar hún var 18 ára gömul og DiCaprio 24 ára, en það er jafnframt minnsti aldursmunur sem hefur verið í sambandi DiCaprio undanfarna tvo áratugi.