Breiðablik er úr leik í 1. umferð forkeppni Evrópudeildarinnar eftir 2-1 tap fyrir Vaduz á útivelli í kvöld. Fyrri leikurinn endaði með markalausu jafntefli.
Leikurinn í kvöld var miklu opnari og skemmtilegri en sá fyrri í Kópavoginum. En þrátt fyrir ágæt færi beggja liða í fyrri hálfleik var staðan markalaus að honum loknum.
Mohamed Coulibaly kom Vaduz yfir eftir hornspyrnu á 57. mínútu. Þrátt fyrir það þurftu Blikar aðeins eitt mark til að komast áfram.
Staða þeirra versnaði til muna þegar Dominik Schwizer kom heimamönnum í 2-0 á 79. mínútu. Hann fylgdi þá eftir skoti Milan Gajic sem Gunnleifur Gunnleifsson varði.
Thomas Mikkelsen fékk dauðafæri þremur mínútum seinna en skaut framhjá.
Höskuldur Gunnlaugsson minnkaði muninn í 2-1 þegar þrjár mínútur voru komnar fram yfir venjulegan leiktíma en nær komust Blikar ekki.
Blikar úr leik eftir tap í Vaduz
