Silva á leið inn í kveðjutímabilið sitt

Spænski miðjumaðurinn David Silva hefur reynst Man. City afar vel en nú er ljóst að hann mun aðeins þjóna félaginu í eitt tímabil í viðbót.

Hinn 33 ára gamli Silva hefur unnið deildina fjórum sinnum með City og bikarinn tvisvar síðan hann kom til félagsins árið 2010.

Hann tók þátt í 33 leikjum í deildinni á síðasta tímabili og finnur að hann er að nálgast endastöð.

„Næsta tímabil verður það síðasta hjá mér. Tíu ár er nóg fyrir mig. Það er fullkominn tími að hætta eftir næsta tímabil,“ sagði Silva. „Tíu ár er flott tala og klárar þennan kafla í mínu lífi. Ég mun ekki spila gegn City heldur halda annað.“