Forstjóri Boeing segir félagið ekki hafa gert mistök við hönnun MAX-vélanna

Dennis Muilenberg, forstjóri Boeing, segir að flugvélaframleiðandinn hafi ekki gert nein tæknileg mistök við hönnun Boeing 737 MAX-vélanna sem eru nú í flugbanni um allan heim vegna tveggja mannskæðra flugslysa.

Þetta kom fram í kynningu Muilenberger hann kynnti ársfjórðungskýrslu Boeing fyrir fjárfestum. Viðurkenndi hann að skynjarar flugvélanna tveggja sem hröpuðu hefðu gefið stýrikerfi flugvélanna vitlausar upplýsingar. Virðist það hafa virkjað kerfi sem Boeing hannaði til að koma í veg fyrir ofris, en kerfið er útskýrt í myndbandi hér fyrir neðan.

„Það eru engin tæknileg mistök hérna,“ sagði Muilenberg. „Við þekkjum flugvélarnar okkar. Við vitum hvernig við hönnuðum þær, hvernig við fengum vottunina og við höfum fulla trú á vörunni,“ sagði Muilenberg og átti við flugvélarnar. 

Bætti hann við að „aðgerðir sem ekki voru framkvæmdar“ hafi átt þátt í slysunum tveimur og virtist hann með því ýja að því að flugmenn vélanna hefðu átt að geta slökkt á kerfinu sem talið er hafa spilað stóran þátt í slysunum tveimur.

Flugslysin tvö og flugbann vélanna hefur haft talsverð áhrif á fjárhag og rekstur Boeing. Haldbært fé félagsins minnkaði um nærri milljarð dollara, um 120 milljarða króna, frá því að vél Ethiopian Airlines hrapaði í mars. Þrátt fyrir það skilaði Boeing 2,15 milljarða dollara hagnaði á fyrsta ársfjórðungi ársins, 13 prósenta lægri hagnaði en á sama tíma á síðasta ári.

Talið er þó að áhrif flugbanns MAX-vélanna muni fyrst fara að mikil áhrif á núverandi ársfjórðungi en flugbannið var ekki sett á fyrr en í blálok síðasta ársfjórðungs.