Segir popúlisma einkenna umræðuna um þriðja orkupakkann: „Fyrirlitlegri stjórnmál er vart hægt að stunda“

Einangrunarhyggja, popúlismi og þröngsýni einkennir umræðuna um þriðja orkupakkann að mati Þorsteins Víglundssonar, þingmanns Viðreisnar.

Í næstu viku stendur til að ræða þriðja orkupakkann á Alþingi. Þorsteinn segist ekki eiga von á gáfulegum umræðum en hann segir skopmyndateikningu Morgunblaðsins lýsa ágætlega viðhorfi andstæðinga þriðja orkupakkans. Þorsteinn lét í ljós sín sjónarmið í stöðuuppfærslu á Facebook.

„Það versta er þó við ómerkilegt lýðskrum sem þetta að umræðan færist frá því sem raunverulega skiptir máli. Það væri óskandi að við færum að ræða af yfirvegun kosti þess og galla að tengjast öðrum raforkumörkuðum.“

Hann segir að það væri óskandi að þingmenn, núverandi og fyrrverandi, sem hafi hæst í umræðunni um málið, byggju yfir framsýni fyrir landsins hönd.

„En því er því miður ekki til að dreifa. Þess í stað er gripið til hræðsluáróðurs popúlistans. Reynt að draga upp mynd af hinum illa óvini í Evrópu sem ætli hér að ræna af okkur auðlindunum með stuðningi „ótýndra ráðamanna“.

Þorsteinn segir að sameiginlegur raforkumarkaður Evrópusambandsins hafi stuðlað að stórbættri orkunýtingu innan sambandsins og átt veigamikinn þátt í að draga úr losun gróðurhúsalofttegunda vegna raforkuframleiðslu.

„Ergo – hér eru heldur göfugri markmið á ferðinni heldur en að ræna þjóðir auðlindum sínum eins og lýðskrumararnir vilja halda fram.“

Þurfi að skoða málið með opnum huga

Þorsteinn tekur þá mið af ákvörðun Norðmanna að fjárfesta í tengingu við evrópska markaðinn og segir að Ísland eigi að skoða það með opnum huga hvort tenging landsins við sameiginlega raforkumarkað ESB sé vænlegur kostur. Norðmenn hafi ekki tekið sína ákvörðun vegna þess að landinu sé stýrt af ótýndum landráðamönnum heldur vegna þess að tengingin skili miklum ábata.

„Að einblína á möguleg verðlagsáhrif heima fyrir, líkt og lýðskrumarar gera, er álíka gáfulegt og að banna fiskútflutning okkar þar sem verð á ýsu hér heima kunni að vera hærra fyrir vikið. Við seljum um 80% af raforkuframleiðslu okkar til útflutnings í gegnum stóriðjuna. Við höfum miklu meiri hagsmuni af því að hámarka verð á raforku heldur en að halda því niðri. Og það er hægur vandi að vega á móti mögulegri hækkun á raforkuverði. Til dæmis með því að fella niður virðisauka á sölu raforku til heimilisnotkunar. Ræðum kosti þessa og galla en nálgumst ekki málið með heimóttarskap og hræðsluáróðri.“

 

Umræðan til marks um þröngsýni og einangrunarhyggju

Þorsteinn segir umræðuna endurspegla þröngsýni og einangrunarhyggju þeirra sem haldi henni helst á lofti

„Þar er ekki til að dreifa þeirri framsýni sem ráðamenn fyrri tíma sýndu með því að leggja höfuðáherslu á þátttöku íslands í alþjóðasamstarfi og alþjóðaviðskiptum.“

Þröngsýni og einangrunarhyggja lýðskrumarans grafi aftur á móti undan hagsmunum þjóðarinnar.

„Með málflutningi sem þeim er alið á ótta og fordómum í þeim tilgangi einum að afla sér atkvæða. Fyrirlitlegri stjórnmál er vart hægt að stunda“.