Sameining við Þórshöfn reynst dýrkeypt að mati Bakkfirðinga

Bakkfirðingar, sem sjá eftir að hafa sameinast Þórshöfn, segja skrítið að um leið og ríkið hvetji til sameiningar sveitarfélaga séu engin verkfæri til að láta hana ganga til baka né til að fylgjast með að staðið sé við sameiningarskilmála. Þetta kom fram í þættinum „Um land allt“ og í fréttum Stöðvar 2. 

Fyrir aldarfjórðungi bjuggu 130 manns á Bakkafirði en síðan hefur íbúum fækkað um helming. Búið er að loka skólanum, leikskólanum og einu búðinni. Þar er ekkert starf eftir í þjónustu.

Áki Guðmundsson, sem rekur fiskvinnslu á Bakkafirði, segir að þegar sveitarfélögin Skeggjastaðahreppur og Þórshöfn sameinuðust í Langanesbyggð árið 2006 hafi verið samið um að skóli og leikskóli yrðu áfram á Bakkafirði en einnig starfsmaður áhaldahúss. 

„Sameinað sveitarfélag, sem lagði af stað undir kjörorðunum „Sameining til sóknar“ hefur reynst okkur gríðarlega dýrkeypt,“ segir Áki.

María Guðmundsdóttir var skólastjóri og Bylgja Dögg Sigurbjörnsdóttir kenndi við skólann, sem lokað var fyrir tveimur árum. 

-Finnst ykkur það hafa verið mistök að sameinast Þórshöfn? 

„Já,“ svarar Bylgja Dögg. 

„Ég segi þetta svolítið.. ég tók einu sinni að mér tvö lömb. Ég væri ekkert rosalega góð í að ala þau upp ef ég hefði drepið annað þeirra. Mín skylda væri að gefa þeim báðum að éta. Og það er eiginlega þannig sem sveitarstjórn á að hugsa,“ segir María.

Skrifstofa Langanesbyggðar er á Þórshöfn. 

„Það er ekki mín upplifun að Langnesingar eða Þórshafnarfólk hafi á einhvern hátt ekki viljað eða ekki sinnt Bakkafirði. Það er ekki mín upplifun,“ segir Elías Pétursson sveitarstjóri.

„Það er skrítið að ríkið skuli hvetja til sameiningar og það eru engin verkfæri til að fylgjast með því hvað gerist. Engin. Það er ekki gert ráð fyrir að þessu sé slitið,“ segir Áki. 

Sveitarstjórinn segir að lokun skólans hafi verið mjög erfið en stefnt hafi í að þar yrðu aðeins fimm börn. 

„Jafn erfitt og þetta er þá verða menn að horfa á þetta svolítið svona út frá því hvað er best að gera en ekki endilega hvað manni langar að gera,“ segir Elías.

Nánar er fjallað um baráttu Bakkfirðinga fyrir tilverugrundvelli byggðarinnar í þættinum „Um land allt“. 

Hér má sjá frétt Stöðvar 2: