Segir ekkert óvenjulegt í fari Jóns Þrastar kvöldið fyrir hvarfið

„Við spjölluðum bara um hvað hann hafi verið að gera um nóttina og hann sagði mér að hann væri bara ennþá að spila og væri að skemmta sér,“ segir Kristjana Guðjónsdóttir, unnusta Jóns Þrastar Jónssonar sem nú er leitað í Dyflinni. Þau áttu samtal kvöldið áður en hann hvarf. Af samtalinu að dæma benti ekkert til þess að nokkuð bjátaði á. Hann hafi hringt í hana og kannað hvort hún væri ekki tilbúin til að fara upp á flugvöll.

Hún kom sjálf til Írlands morguninn eftir. Hún hitti hann stuttlega uppi á hótelherbergi og fór niður á undan honum. Skömmu síðar sést hann yfirgefa hótelið rétt eftir klukkan ellefu um morguninn.  

Írskir fjölmiðlar greina frá því í dag að talið sé að Jón Þröstur hafi tapað um 4.000 evrum, eða sem samsvarar um hálfri milljón íslenskra króna, í póker kvöldið áður en hvarf. Jón Þröstur hafði ferðast til Írlands til þess að taka þátt í pókermóti.

Kristjana segir að hann hafi sagt sér að hann hafi tapað hárri upphæð. Það ætti hinsvegar ekki að hafa verið honum áfall þar sem hann sé reyndur pókerspilari og að því fylgi að tapa stundum. „Þetta hefur aldrei verið neitt vandamál fyrir okkur,“ segir Kristjana.

„Við höfum aldrei neitt verið að fela fyrir hvoru öðru. Þetta er upp og niður. Við spilum bæði og vitum hvernig leikurinn virkar.“

Kristjana segir hann ekki hafa haft neina ástæðu til að láta sig hverfa þar sem hann hafi verið spenntur fyrir framtíðarplönum sínum. Hann hafi meðal annars verið hamingjusamur yfir því að hafa samið við barnsmóður sína um að fá viku á móti viku viðveru með eldri dóttur sinni. Þá hafi hann unnið sér inn réttinn til að keyra sinn eigin leigubíl og þau hafi verið byrjuð að skoða bíla til þess.

„Hann var rosalega spenntur fyrir þessu að geta unnið fyrir sjálfan sig.“

Í gærkvöldi var birt nýtt myndefni úr öryggismyndavélum af Jóni Þresti og fjallað um mál hans í sjónvarpi. Fjöldi ábendinga barst lögreglunni ytra í kjölfarið.

Lögreglan á Íslandi hefur þá veitt Írsku lögreglunni aðstoð sína en málið er á forræði lögreglunnar úti.

„Við höfum gert allt það sem við getum til að útvega gögn sem þeir telja nauðsynlegt að hafa við sínar aðgerðir,“ segir Karl Steinar Valsson, yfirlögregluþjónn hjá lögreglunni á höfuðborgarsvæðinu. „Við höfum líka verið í nánast daglegum samskiptum við þá síðan að þetta mál kemur upp.“