Leita sjálfboðaliða til að aðstoða við leit að Jóni Þresti

Fjölskylda Jóns Þrastar Jónssonar, Íslendingsins sem hvarf í Dublin um síðustu helgi, leitar nú sjálfboðaliða til þess að aðstoða við leitina að Jóni nærri svæðinu þar sem síðast sást til hans.

Ekkert hefur spurst til Jóns síðan um síðustu helgi. Dublin Live greinir frá því að systkini Jóns og aðrir fjölskyldumeðlimir höfðu haldið til Dublin í vikunni þar sem unnusta hans hefur verið frá hvarfi hans. Jón og unnustan voru saman á ferðalagi í Dublin þegar hann hvarf.

Jón yfirgaf hótel sitt á laugardagsmorguninn fyrir viku síðan og var hann símalaus. Síðast sást til Jóns í Whitehall klukkan ellefu sama morgun og hefur lögregla óskað eftir aðstoð almennings við leitina.

Í tilkynningu lögreglunnar segir að Jón hafi verið klæddur í svartan jakka, hann sé með stutt brúnt hár og 184 sentimetrar á hæð.