Dregur tilnefningu sína til sendiherra Sameinuðu þjóðanna til baka

Heather Nauert, talskona utanríkisráðuneytis Bandaríkjanna og fyrrum fréttamaður og þáttastjórnandi hjá Fox News, hefur dregið tilnefningu sína til sendiherrastöðu hjá Sameinuðu þjóðunum til baka.

Sjá einnig: Talskona utanríkisráðuneytisins verður tilnefnd sem sendiherra hjá SÞ

Tilnefning Nauert vakti mikla athygli á sínum tíma en hún hafði enga reynslu af opinberum störfum fyrr en hún var valin til að gegna stöðu talsmanns utanríkisráðuneytisins í fyrra. Hún segir ákvörðunina um að draga tilnefningu sína til baka hafa verið tekna í þágu fjölskyldunnar.

„Síðustu tveir mánuðir hafa verið afar erfiðir,“ sagði Nauert í yfirlýsingu sem hún sendi frá sér á laugardag en tveir mánuðir eru liðnir frá því að Donald Trump Bandaríkjaforseti tilnefndi hana til stöðunnar.

Nauert hefði tekið við af Nikki Haley sem sagði af sér sem sendiherra í byrjun október á síðasta ári. Sjá frétt BBC um málið.