Umfjöllun um stórsigur á Barein: Fullkomin gönguferð í garðinum

Íslenska landsliðið í handbolta nældi í sín fyrstu stig á HM 2019 í handbolta í dag þegar að liðið rúllaði yfir Persaflóaríkið Barein í Ólympíuhöllinni með 18 mörkum, 36-18.

Vitað var að Ísland myndi hafa sigur í leiknum en hann var á endanum gríðarlega sannfærandi og strákunum til mikils hróss hvernig þeir keyrðu á fullum hraða allan seinni hálfleikinn og gjörsamlega völtuðu yfir ráðþrota Bareinmenn.

Sigurhrinan er vonandi hafin því íslenska liðið þarf að vinna næstu tvo leiki til að komast í milliriðilinn en allt minna en það væru mikil vonbrigði fyrir Guðmund og strákana. Nú tekur við eins dags pása áður en spilað verður við Japan og Makedóníu á miðvikudag og fimmtudag.

Bolti í andlit og Björgvin vaknaði

Björgvin Páll Gústavsson átti stórleik í dag og varði fimmtán skot og var með 50 prósent hlutfallsmarkvörslu samkvæmt HB Statz þar sem að hann fékk tíu í markmannseinkunn. Hann varði fjögur af átta vítaköstum sem að hann fékk á sig og var heldur betur í stuði.

Snemma leiks skaut leikmaður Barein í andlitið á Björgvini úr vítakasti sem virtist vekja síðhærða markvörðinn. Björgvin breyttist í leiðinlegustu útgáfuna af sér, það er að segja leiðinlegustu fyrir mótherjana. Allir Íslendingar elska þegar að Björgvin er með stæla, rífandi smá kjaft, fá mótherjana upp á tærnar og taka eitt eða tvö dansspor.

Varnarleikur íslenska liðsins var góður og hjálpaði Björgvini mikið í markinu en hann var líka að taka sín dauðafæri og er þetta líklega besti leikur sem íslenski landsliðsmarkvörðurinn hefur spilað í langan tíma. Hann brosti út að eyrum allan tímann og fékk heiðursskiptingu þegar að korter var eftir.

Björgvin er þó eldri en tvævetur í bransanum og veit að þessi frammistaða skilaði bara tveimur stigum í dag. Nú er að vona að hann geti kafað í reynslubankann og tekið þetta stíganda með sér inn í næstu verkefni.

Allt á fullu

Það getur verið erfitt að spila á móti leikmönnum eins og Barein hefur yfir að ráða því stundum virðast þeir ekki sjálfir vita hvað þeir ætla að gera. Okkar menn voru 16-10 yfir í hálfleik en stilltu svo strengina í varnarleiknum í hálfleiknum og byrjuðu þann síðari á 8-2 kafla og gerðu út um leikinn.

Á þeim tímapunkti hefði verið auðvelt að hætta og missa leikinn í eitthvað kæruleysi en svo varð ekki. Guðmundur rúllaði vel á liðinu og það góða við að vera með svona ungt lið er að menn eru hungraðir og allir sem komu inn vildu sýna sig í vörn og sókn.

Sigvaldi Guðjónsson nýtti öll þrjú færin sín, Gígli Þorgeir var áræðinn eins og í síðasta leik, Teitur Örn Einarsson reif þrisvar sinnum gat á netið með sunnlenskum þrumum og Elvar Örn nýtti sömuleiðis öll sín færi. Það var reyndar ekkert sérstaklega erfitt gegn keilunum í marki Barein sem vörðu samtals heil tvö skot.

Á meðan mikið er rætt um þessa nýju stráka má samt ekki gleyma að minnast á enn einn FH-inginn sem er að gera vel á þessu móti en reynsluboltinn Ólafur Guðmundsson hefur nánast spilað fullkomlega í vörn og sókn hverja einustu mínútu sem hann hefur verið inn á. Ólafur lætur ekki mikið fyrir sér fara heldur skilar bara fagmannlegu hlutverki þegar hann kemur inn á.

Fullkomið fyrir framhaldið

Guðmundur Guðmundsson hefði ekki getað beðið um betri leik frá sínum strákum því það gekk gjörsamlega allt upp. Leikurinn vannst stórt, strákarnir komnir á blað og vonandi með smá sjálfstraust, Björgvin varði í markinu og þá náði hann að rúlla vel á liðinu.

Strákarnir komust heilir í gegnum þennan leik sem var á endanum gönguferð í garðinum gegn arfaslöku og dauðþreyttu liði Barein en auðvitað spilar enginn betur heldur en andstæðingurinn leyfir. Og Barein var ekki leyft að gera nokkurn skapaðna hlut í dag.

Orðið EN verður alltaf notað eftir svona sigur. Góður sigur, EN, þetta var bara Barein. Það má enginn ofmetnast þó frammistaðan hafi verið eins góð og hún mögulega gat verið.

Þetta var skref í átt að fyrsta markmiðinu sem er að komast til Kölnar í milliriðilinn en gönguferðirnar verða erfiðari en þetta á þeirri leið.