Klopp kærður fyrir að hlaupa inn á völlinn

Enska knattspyrnusambandið ákvað í dag að kæra Jürgen Klopp, knattspyrnustjóra Liverpool, fyrir hegðun hans undir lok leiks Liverpool og Everton í gær.

Klopp missti sig í gleðinni er hans menn skoruðu ótrúlegt sigurmark í uppbótartíma og hljóp inn á völlinn til þess að fagna.

Klopp baðst afsökunar á hegðun sinni eftir leik en hann hefur fram á fimmtudag til þess að svara kærunni formlega.

„Ég verð að biðjast afsökunar því ég ætlaði ekki að sýna neinum vanvirðingu. Ég bara réð ekki við mig,“ sagði Klopp eftir leikinn.

Fastlega er búist við því að Klopp fái sekt fyrir sprettinn en ekki leikbann.