Weiner losnar fyrr úr fangelsi

Anthony Weiner, fyrrverandi þingmaður Demókrataflokksins í Bandaríkjunum, sem dæmdur var í 21 mánaðar fangelsi fyrir að senda 15 ára gamalli stúlku kynferðisleg skilaboð verður sleppt þremur mánuðum fyrr úr fangelsi fyrir góða hegðun.

Weiner hefur að undanförnu afplánað í Devens, Massachusetts, en dómur féll í máli hans 25. september 2017.

Weiner komst í heimsfréttirnar árið 2011 þegar það komst upp um hann að hann hafi sent kynferðislegar myndir af sjálfum sér á aðrar konur en eiginkonu hans. Hann sagði af sér þingmennsku í kjölfarið. 

Weiner gerði aðra tilraun til að snúa aftur á vettvang stjórnmálanna tveimur árum síðar en ekki með góðum árangri því djarfar myndir sem hann sendi til kvenna fóru í umferð.

Til stendur að Weiner losni úr fangelsi 14. maí næstkomandi. Upphaflega stóð til að hann afplánaði út sumarmánuði ársins 2019.