Hluthafar N1 samþykktu að takmarka kaupauka forstjóra við þrjá mánuði í stað sex

Ný samkeppnisstefna, endurskoðuð starfskjarastefna og nýtt nafn var samþykkt á hluthafafundi N1 sem fram fór í höfuðstöðvum félagsins að Dalvegi í Kópavogi í dag.

Samþykkt var á fundinum að breyta nafni félagsins úr N1 í Festi hf. eftir kaup þess á Krónunni, Nóatúni, Elko, Festi fasteignum og Bakkanum vöruhóteli. Á fundinum var jafnframt samþykkt ný samkeppnisstefna sem byggir á sátt við Samkeppniseftirlitið og endurskoðuð kjarastefna var samþykkt.

Kjarastefnan gerir meðal annars ráð fyrir að hámarks kaupauki forstjóri geti orðið að hámarki 3 mánuðir í stað 6 mánaða áður, óheimilt sé að greiða umfram ráðningarsamning við uppsögn forstjóra og vill stjórn félagsins með þessu skapa fordæmi í íslensku atvinnulífi með því að sýna hógværð í breytilegum launagreiðslum til æðstu stjórnenda.

Á fundinum var jafnframt kjörin ný stjórn yfir Festi hf. Í stjórn voru kjörin þau:

• Björgólfur Jóhannsson
• Guðjón Karl Reynisson
• Kristín Guðmundsdóttir
• Margrét Guðmundsdóttir
• Þórður Már Jóhannesson

Á stjórnarfundi sem haldinn var í kjölfar fundarins var Margrét Guðmundsdóttir, endurkjörin sem formaður stjórnar og Þórður Már Jóhannesson kjörinn varaformaður.