Blikakonur verða Íslandsmeistarar með sigri í kvöld

Blikar geta haldið sigurhátíð í Smáranum í kvöld takist stelpunum þeirra að ná í stigin sem upp á vantar til að tryggja þeim meistaratitilinn.

Kvennalið Breiðabliks getur tryggt sér sigur í Pepsideild kvenna í kvöld nái liðið að vinna Selfoss á Kópavogsvellinum. Þetta er leikur í 17. og næstsíðustu umferð Pepsideildar kvenna.

Leikurinn verður sýndur beint á Stöð 2 Sport í kvöld en hann hefst klukkan 17.00.

Breiðablik getur unnið sinn sautjánda Íslandsmeistaratitil en þetta yrði sá fyrsti síðan árið 2015 og „aðeins“ annar Íslandsmeistaratitill kvennaliðs félagsins á síðustu þrettán árum.

Breiðablik náði fimm stiga forystu á Þór/KA með 3-0 sigri í innbyrðisleik liðanna á dögunum og nú eru aðeins sex stig eftir í pottinum. Sigur Blika í kvöld þýddi að Þór/KA gæti ekki lengur náð Blikum að stigum.

Blikar hafa þegar unnið bikarkeppnina í sumar og geta Blikakonur því unnið tvöfalt. Blikar hafa ekki unnið tvöfalt síðan árið 2005 eða í þrettán ár.

Breiðablik vann 1-0 sigur á Selfossi í fyrri leik liðanna og þá skoraði Selma Sól Magnúsdóttir sigurmarkið. Selma Sól er ekki með Blikum í kvöld því hún stundar nám við South Carolina háskólann í Columbiu.

Heil umferð fer fram í Pepsideild kvenna í kvöld. Blikakonur yrðu einnig Íslandsmeistarar, sama hvernig fer hjá þeim á móti Selfossi, takist Þór/KA ekki að vinna Val.

Þá er líka hálfgerður úrslitaleikur um fallið þegar KR tekur á móti Grindavík á Alvogenvellinum í Vesturbænum.

KR-konur geta fellt Grindavíkurkonur með sigri. Vinni Grindavík leikinn þá fara liðin jöfn að stigum inn í lokaumferðina. Leikurinn verður sýndur beint á Stöð 2 Sport 2.

Leikir kvöldsins í 17. umferð Pepsideildar kvenna:

Þórsvöllur 17.00 Þór/KA - Valur

Alvogenvöllurinn 17.00 KR - Grindavík

Kaplakrikavöllur 17.00 FH - Stjarnan

Hásteinsvöllur 17.00 ÍBV - HK/Víkingur

Kópavogsvöllur 17.00 Breiðablik - Selfoss