Fimm hermenn felldir af aðskilnaðarsinnum

Fimm úkraínskir hermenn hafa fallið í átökum við aðskilnaðarsinna sem studdir eru af Rússum í austurhluta Úkraínu. Varnarmálaráðuneyti ríkisins segir þar að auki að sjö hafi særst í árás aðskilnaðarsinna.

Bardagar munu hafa staðið yfir í fimm klukkustundir nærri Krymske. Þar féllu fjórir hermenn en sá fimmti féll í stórskotaárás.

Ríkisstjórn Úkraínu og aðskilnaðarsinnar saka hvorn annan reglulega um að rjúfa vopnahlé á milli fylkinga.

Samkvæmt BBC eru aðskilnaðarsinnar sagðir hafa reynt að ná tökum á varðstöðum hersins á þjóðvegi á víglínunni. Þá sagði forseti Úkraínu, Petro Poroshenko, að skotið hefði verið á hermennina með stórskotaliði og sagði hann byssurnar koma frá Rússum.



Fylkingarnar hafa verið að semja um nýtt vopnahlé sem á að taka gildi þann 29. ágúst.

Rúmlega tíu þúsund manns hafa fallið í átökunum sem hófust í kjölfar innlimunar Rússa á Krímskaga árið 2014.