Bláa Lónið meðal hundrað bestu staða heims

Nýtt hótel og heilsulind Bláa Lónsins er einn af hundrað bestu stöðum heimsins Samkvæmt Time Magazine. Um er að ræða úttekt sem Time er að gera í fyrsta sinn. Stöðunum er skipt niður í þrjá flokka; þjóðgarða og söfn, veitingastaði og hótel. Matið er unnið út frá gæðum, frumleika, nýsköpun og sjálfbærni.



Listi Time telur hundrað staði í sex heimsálfum og 48 löndum.

Í tilkynningu frá Bláa Lóninu segir Már Másson, yfirmaður markaðs- og mannauðsmála, að þetta sé mikill heiður fyrir fyrirtækið.

„Athyglin sem nýja hótelið, heilsulindin og veitingastaðurinn hafa fengið, á þeim stutta tíma sem liðinn er frá opnun, er enn ein rósin í hnappagat starfsfólks Bláa Lónsins,“ segir Már.

Í Time segir meðal annars að mikil fjárfesting hafi átt sér stað í ferðamannaiðnaðinum á undanförnum árum og að Bláa Lónið sé eitt megin aðdráttarafl landsins. Þar hafi nú opnað nýtt hótel sem er umlukið 800 ára gömlu hrauni, þar sé að finna dýrindis veitingastað, neðanjarðarheilsulind og 62 herbergi, þar af fjögur sem hafi aðgang að einkalónum.

Sjálft Bláa Lónið er eitt þekktasta vörumerki Íslands og hefur National Geographic meðal annars valið það sem eitt af 25 undrum veraldar.