Búið að loka Ölfusárbrú

Starfsmenn Vegagerðarinnar hafa nú lokað Ölfusárbrú við Selfoss og er reiknað með að hún verði lokuð til 20. ágúst. Brúnni var lokað um klukkan 16 nú síðdegis.

Hjáleið fyrir almenna umferð verður meðal annars um Þrengsli og Óseyrarbrú þá daga sem lokunin stendur yfir.

Steypa þarf nýtt brúargólf á Ölfusárbrú en það tekur steypuna nokkra daga að harðna. Um sautján þúsund bílar aka á hverjum degi yfir brúna. 

Breidd brúarinnar er aðeins 6,1 metrar og er áætlað vinnusvæði 3,3 metrar þannig að ómögulegt myndi reynast að halda einni akrein opinni fyrir almenna umferð. Á vef Vegagerðarinnar segir að umferðastýring myndi tefja vinnu mikið og gæti tvöfaldað eða jafnvel þrefaldað framkvæmdatímann.

Í uppsveitum eru hjáleiðir um Biskupstungnabraut (35). Skálholtsveg (31), Bræðratunguveg (359) og Skeiðaveg (30). Gangbrautin á Ölfusárbrú verður opin á framkvæmdatímanum.