Maðurinn sem var stunginn í hálsinn sagður úr lífshættu

Maðurinn sem var stunginn í hálsinn á Akranesi í gærkvöldi er ekki lengur í lífshættu. Þetta kemur fram í tilkynningu frá Lögreglunni á Vesturlandi sem segir að farið verði fram á gæsluvarðhald yfir manninum sem er grunaður um árásina síðar í dag.

Mennirnir tveir eru báðir búsettir á þeim stað sem atvikið átti sér stað.

Lögreglunni barst tilkynning rétt fyrir miðnætti í gærkvöldi frá Sjúkrahúsinu á Akranesi vegna manns sem hafði leitað þangað og lét ófriðlega.

Þegar lögreglumenn komu á vettvang var maðurinn á bak og burt. Á meðan lögreglumenn voru enn á vettvangi barst svo önnur tilkynning frá manni sem búsettur er nærri sjúkrahúsinu. Bað sá um aðstoð lögreglu þar sem verið væri að ráðast á hann. Við þetta bættist svo þriðja tilkynningin um að maður hefði verið stunginn með hnífi þarna.

Sjúkraflutningamenn á Akranesi ásamt lögreglu fóru á vettvang. Í ljós kom að að maður hafði verið stunginn í hálsinn með hníf og var hann fluttur með hraði á Sjúkrahúsið á Akranesi og eftir aðhlynningu þar og undirbúning var hann fluttur til Reykjavíkur á Landspítala.

Sá sem fyrir stungunni varð, var sá hinn sami og látið hafði ófriðlega á sjúkrahúsinu skömmu áður.