Fyrsti risatitill Djokovic í 25 mánuði

Novak Djokovic vann sinn fjórða Wimbledon titil í dag með öruggum sigri á Kevin Anderson í úrslitaleiknum. Djokovic vann leikinn í þremur settum.

Anderson spilaði einn lengsta leik í manna minnum, annan lengsta leik í sögu Wimbledon, á föstudag þegar hann vann John Isner í undanúrslitunum. Leikurinn tók sex klukkutíma og 35 mínútur og var Anderson í heildina úti á vellinum í nær 11 klukkutíma.

Djokovic mætti Rafael Nadal í hinum undanúrslitaleiknum og var hann sá fimmti lengsti í sögu Wimbledon. Það var hins vegar hlé á þeim leik, þeir hófu leik á föstudagskvöld að loknum leik Anderson og Isner, en þurftu að gera hlé á leiknum fram til laugardagsmorguns.

Suður-Afríkumaðurinn var greinilega ekki búinn að endurheimta alla sína orku í dag og gekk illa að halda í við Djokovic. Serbinn vann í þremur settum 6-2, 6-2, 7-6 (7-3).

Þetta var fyrsti risatitill Djokovic í 25 mánuði.

„Þetta er frábær tilfinning því í fyrsta skipti get ég fagnað með syni mínum,“ sagði Djokovic eftir leikinn.

„Það er enginn staður í heiminum betri fyrir endurkomuna. Þetta er heilagur staður í tennisheiminum. Sem drengur dreymdi mig um að halda á þessum verðlaunagrip og þetta er mjög sérstakt.“