Blessuð sólin skín á borgina

Það er komið að því. Sólin mun láta sjá sig á suðvesturhorninu í dag, eflaust við mikinn fögnuð gegnvotra höfuðborgarbúa. Spákort Veðurstofunnar bera þó með sér að það verði nokkuð þungbúið í morgunsárið og jafnvel að það kunni að örla á dálítilli vætu fram að hádegi.



Hér neðst í fréttinni er veðurkort þar sem sjá má þróun mála í dag.

Eftir því sem líður á morguninn mun þó hæðarhryggur, sem nú er yfir Grænlandshafi, færa sig nær landinu. Með komu hans mun skýjahula morgunsins þó smám saman brota upp á vesturhelmingi landsins - „og blessuð sólin tekur að skína á menn og málleysingja,“ eins og veðurfræðingur orðar það.

Hæðarhryggurinn verður svo kominn vel inn yfir landið á morgun og því er spáð ágætu veðri með „talsverðu sólskini.“ Sömu sögu er þó ekki að segja allra austast af landinu þar sem verður líklega áfram þungbúið og einver væta til kvölds. Hitinn verður einnig prýðilegur í dag og á morgun, 8 til 18 stig og verður hlýjast sunnanlands.

Gleðin á suðvesturhorninu verður þó skammlíf að þessu sinni. Nýjar lægðir og úrkomusvæði mun sækja að landinu þegar líður á miðvikudag og síðan aftur á föstudag.

Veðurhorfur á landinu næstu daga

Á þriðjudag:

Hæg norðlæg eða breytileg átt og léttskýjað á V-verðu landinu, en skýjað eystra og þokuloft eða súld við ströndina. Hiti 10 til 19 stig, hlýjast S-til. 

Á miðvikudag:

Hæg suðlæg átt og bjart með köflum, en dálítil væta við S- og V-ströndina um kvöldið. Hiti 12 til 17 stig að deginum. 

Á fimmtudag:

Hægir vindar, skýjað með köflum og yfirleitt þurrt, en áfram fremur hlýtt. 

Á föstudag:

Sunnanátt og rigning eða súld, en lengt af þurrt NA-til. Milt veður. 

Á laugardag:

Vestlæg eða breytileg átt og víða skúrir eða dálítil rigning og kólnar lítið eitt. 

Á sunnudag:

Útlit fyrir norðlæga átt með lítilsháttar vætu úti við N-ströndina, en annars bjart með köflum og fremur svalt