Framanákeyrslum fjölgar verulega

Mikil fjölgun var á framanákeyrslum á vegum landsins fyrstu fjóra mánuði ársins. Þá hefur fjöldi slasaðra og látinna erlendra ferðamanna rúmlega tvöfaldast frá því í fyrra.

Í slysaskráningu samgöngustofu kemur fram að mikil aukning hefur verið á framanákeyrslum á vegum landsins það sem af er ári. Í skýrslunni kemur fram að fjöldi slasaðra og látinna erlendra ferðamanna hafi rúmlega tvöfaldast frá því í fyrra og fjölgar um 138% á meðan slysum Íslendinga fjölgar um 49%. 

„Aðgreining á akstursstefnum er augljóslega af skornum skammti og þarna sjáum við að vegrið getur bjargað mannslífi. Fólk er að keyra hraðar og af einhverjum undarlegu ástæðum eykst hraðinn í efnahagslegum uppgangi,“ segir Þórhildur Elínardóttir, samskiptastjóri Samgöngustofu.

Af þessum 77 slysum sem hafa átt sér stað eru fimmtán þeirra vegna fíkniefnaaksturs að sögn Þórhildar. Þá segir hún engin tilvik verða vegna svefns undir stýri. Fleiri slys verði utan höuðborgarsvæðisins en dreifingin sé mjög mikil um landið.