Erkibiskup í 12 mánaða fangelsi

Kaþólskur erkibiskup í Ástralíu hefur verið dæmdur í 12 mánaða fangelsi  fyrir að hylma yfir kynferðisbrot innan kirkjunnar á áttunda áratug síðustu aldar.

Aldrei áður hefur jafn háttsettur embættismaður innan kaþólsku kirkjunnar í heiminum verið fundinn sekur um brot af þessu tagi. Biskupinn, Philip Wilson, er sagður hafa aðstoðað presta í Ástralíu við að hylma yfir brot sín gegn altarisdrengjum en hann hefur ætíð neitað sök.

Hann var fundinn sekur um brotin í síðasta mánuði en var aftur leiddur fyrir dómara í morgun sem ákvað refsingu hans. Wilson hlaut 12 mánaða fangelsisdóm sem fyrr segir en gert er ráð fyrir því að hann muni afplána hann í stofufangelsi. Hann getur sótt um reynslulausn eftir um hálft ár.

Sjá einnig: Erkibiskup fundinn sekur um hylmingu

Dómarinn í málinu segir að Wilson hafi ekki sýnt neina iðrun við aðalmeðferðina. Hann hefur til að mynda ekki enn sagt af sér sem erkibiskup í Adelaide, þrátt fyrir dóminn. Hann baðst þó undan skyldum sínum í aðdraganda dómsuppkvaðningarinnar.

Dómara málsins þótti sannað að Wilson hafi ekki greint frá kynferðisbrotum prestsins James Patrcik Fletcher, sem dæmdur var fyrir níu brot gegn börnum árið 2004. Hann lést árið 2006.

Wilson þvertók fyrir það að hafa vitað af framferði Fletcher. Hann segist þannig ekkert til í því að þolendur prestsins hafi tjáð honum af brotunum á sínum tíma. Einn þolendanna sem bar vitni við réttarhöldin sagði að Wilson hafi skammað sig fyrir að bera sakirnar á prestana. Drengurinn, sem þá var 11 ára, sagði að Wilson hafi sakað sig um lygar og ætti því að fara með tíu Maríubænir til að gera upp syndir sínar.

Verjendur Wilson reyndu fjórum sinnum að fá málinu vísað frá vegna heilsu biskupsins. Hann er 67 ára gamall og hefur verið greindur með Alzheimer.