Emil besti leikmaður Íslands á HM

Emil Hallfreðsson stóð sig best af leikmönnum íslenska landsliðsins í fótbolta á HM í Rússlandi samkvæmt frammistöðumati blaðamanna Vísis.

Emil fékk níu fyrir báða leiki sína, á móti Argentínu og Króatíu, og var hann með langhæstu meðaleinkunn leikmanna íslenska liðsins.

Emil Hallfreðsson var frábær á miðju íslenska liðsins gegn besti liðum riðilsins og það voru margir mjög óánægðir með það þegar Heimir Hallgrímsson tók hann úr byjunarliðinu fyrir Nígeríuleikinn.

Íslenska liðið átti sinn langslakasta leik á móti Nígeríu og þeir leikmenn sem spiluðu þann leik lækkuðu meðaleinkunn sína mjög mikið með þeim leik.

Það skýrir að hluta til yfirburðarstöðu Emils á þessum lista en það mótmæla því örugglega mjög fáir að Emil hafi verið besti leikmaður Íslands á HM.

Jafnir í 2. til 4. sæti voru síðan þeir Aron Einar Gunnarsson, Gylfi Þór Sigurðsson og Ragnar Sigurðsson með 7,67 í meðaleinkunn.

Jóhann Berg Guðmundsson og Kári Árnason voru saman í fimmta sætinu með 7,5 í meðaleinkunn og jafnir í sjöunda sætinu voru síðan hetjurnar í fyrsta leiknum á móti Argentínu, þeir Alfreð Finnbogason og Hannes Þór Halldórsson.

Fimmtán leikmenn fengu einkunn fyrir einn leik eða fleiri en þrír leikmenn til viðbótar, Ari Freyr Skúlason, Arnór Ingvi Traustason og Albert Guðmundsson, komu inná sem varamenn í mótinu án þess að fá einkunn.

Hæsta meðaleinkunnn íslensku leikmannanna á HM 2018:

1. Emil Hallfreðsson    9,00

2. Aron Einar Gunnarsson    7,67

2. Gylfi Þór Sigurðsson    7,67

2. Ragnar Sigurðsson    7,67

5. Jóhann Berg Guðmundsson    7,50

5. Kári Árnason    7,50

7. Alfreð Finnbogason    7,33

7. Hannes Þór Halldórsson    7,33

9. Birkir Már Sævarsson    7,00

9. Sverrir Ingi Ingason    7,00

11. Hörður Björgvin Magnússon    6,67

12. Birkir Bjarnason    6,33

13. Rúrik Gíslason    6,00

14. Björn Bergmann Sigurðarson    5,00

15. Jón Daði Böðvarsson    4,00