HM í hættu hjá Kompany

Vincent Kompany, fyrirliði Manchester City, gæti misst af HM í Rússlandi eftir að hann meiddist í vináttulandsleik Belga og Portúgal í gærkvöld.

Kompany þurfti að fara af velli í leiknum í gær eftir 55 mínútur vegna meiðsla í nára. Leiknum lauk með markalausu jafntefli.

„Þú fannst það á andrúmsloftinu að allir voru mjög áhyggjufullir þegar hann fór út af,“ sagði landsliðsþjálfarinn Roberto Martinez eftir leikinn.

„Hann sagðist finna fyrir óþægindum í nára þegar hann fór af velli. Hann er ekki unglamb og þekkir líkama sinn. Á þessum tímapunkti var það það rétta í stöðunni að taka hann út af.“

Martinez sagði það taka allt að tvo sólarhringa að fá skorið um það hversu alvarleg meiðslin eru en Kompany þarf að fara í myndatöku.

Martinez á enn eftir að velja 23 manna lokahóp sinn fyrir HM en hann þarf að gera það í síðastsa lagi á morgun, 4. júní.