Kanna hvort hægt sé að svipta líkamsræktarstöðvar leyfi ef upp kemst um sölu stera

Meirihluti velferðarnefndar vill láta skoða hvort unnt sé að svipta líkamsræktarstöðvum leyfi komist upp um sölu frammistöðubætandi efna og lyfja innan veggja þeirra.

Þetta kemur fram í áliti meirihluta nefndarinnar um frumvarp til laga um bann við tilteknum frammistöðubætandi efnum og lyfjum.

Markmið frumvarpsins er að koma í veg fyrir að tiltekin efni og lyf séu notuð til að bæta líkamlega frammistöðu og tryggja að meðferð og notkun slíkra efna og lyfja valdi ekki heilsutjóni ásamt því að koma í veg fyrir ólögmæta markaðssetningu þeirra. Frumvarpinu er meðal annars ætlað að hafa áhrif á þá sem standa að ólöglegum innflutningi, útflutningi, sölu, kaupum, skiptum, afhendingu, móttöku, framleiðslu og vörslu framangreindra lyfja.

Á fundi nefndarinnar fór fram töluverð umræða um líkamsræktarstöðvar og þann vanda að notendur nálgist efni og lyf innan þeirra.

Fulltrúar íþróttahreyfingarinnar bentu á að þeir teldu stærsta vandann ekki vera innan skipulagðrar íþróttastarfsemi enda væri eftirlitið þar öflugt. Hins vegar væri ekkert eftirlit með sölu slíkra efna og lyfja innan veggja líkamsræktarstöðva og þar væri vandinn því enn stærri.

Meiri hluti nefndarinnar tók undir þessar áhyggjur og beindi því til velferðarráðuneytisins að skoða mál er viðkoma líkamsræktarstöðvum sérstaklega, þar með talið leyfisveitingar stöðva og hvort unnt sé að svipta þær leyfi komist upp um sölu frammistöðubætandi efna og lyfja innan veggja þeirra.

Vísir hefur áður fjallað um afstöðu líkamsræktarstöðva hér á landi til neyslu frammistöðubætandi efna og lyfja.

Reebok Fitness áskilur sér rétt til að setja viðskiptavini sína í lyfjapróf. Þetta kemur fram í skilmálunum sem þeir sem kaupa sér aðgang að stöðinni skrifa undir. Þar segir að prófið sé framkvæmt samkvæmt reglum og stöðlum Íþrótta- og Ólympíusambands Íslands og að tekið sé mið af bannlista WADA.

World Class er með slíkt ákvæði í sínum skilmálum. Verði einhver uppvís að notkun eða vörslu ólöglegra efna þar verður viðkomandi skilyrðislaust rekinn frá stöðinni. Ef sala eða dreifing á ólöglegum efnum fer fram innan veggja World Class verður málinu umsvifalaust vísað til lögreglu.

Ólafur Þór Hauksson héraðssaksóknari og Kolbrún Benediktsdóttir varahéraðssaksóknari sendu umsögn um frumvarpið sem þau telja til bóta.

Vakti embættið athygli á því í umsögn sinni að sterkar vísbendingar séu um að að sakborningar í alvarlegum ofbeldisbrotum noti slík efni, þ.e. stera. Þetta hefur ekki verið rannsakað sérstaklega innan refsivörslukerfisins en það er mat þeirra sem starfa við ákærumeðferð málanna að það sé aukning í notkun þessara efna meðal þeirra sem grunaður eru um gróf ofbeldisbrot.