Elín Metta tryggði Val sigur í Eyjum

Valur vann sinn þriðja leik í röð í Pepsi deild kvenna þegar liðið sótti sigur til Vestmannaeyja í kvöld.

Það var fátt um færi í fyrri hálfleik en Thelma Björk Einarsdóttir skoraði fyrsta mark leiksins þegar aðeins þrjár mínútur voru liðnar af seinni hálfleik. Þrumuskot rétt utan teigs sem syngur í netinu.

Elín Metta Jensen nældi í vítaspyrnu á 60. mínútu þegar Caroline van Slambrouck braut á henni innan teigs. Elín Metta fór sjálf á punktinn og skoraði.

Heimkonur náðu að klóra í bakkann á 77. mínútu þegar Shameeka Fishley fylgdi eftir skoti Ingibjargar Lúcíu Ragnarsdóttur og skoraði fyrir ÍBV.

Elín Metta var hins vegar snögg að koma Valskonum aftur í tveggja marka forystu en hún skoraði eftir undirbúning Ásdísar Karenar Halldórsdóttur.

Valur er í þriðja sæti deildarinnar með 12 stig eftir fimm leiki. ÍBV er í því fimmta með sex stig.

Upplýsingar um úrslit og markaskorara eru fengnar frá Fótbolta.net.