Áherslur munu breytast með aðkomu Viðreisnar að meirihluta í borginni

Oddvitar flokkanna fjögurra sem vinna að myndun nýs meirihluta í borginni segja að honum muni fylgja breyttar áherslur í ýmsum málum frá því sem verið hafi hjá fráfarandi meirihluta. Þjónusta við borgarbúa og fyrirtæki verði efld og einfölduð en ekki verði skipað í embætti fyrr en flokkarnir hafi náð saman um málefnin.

Viðreisn ákvað seinnipartinn í gær að ganga til formlegra viðræðna um myndun nýs meirihluta í borginni með fráfrandi meirihlutaflokkum, Samfylkingu, Pirötum og Vinstri grænum.

Oddvitar flokkanna fjögurra komu saman í marshall húsinu á Granda um klukkan ellefu í morgun. Þau eru öll mjög bjartsýn á að það takist að mynda þennan meirihluta. En þau hafa góðan tíma til þess þar sem fyrsti borgarstjórnarfundur nýrra borgarfulltrúa er ekki fyrr en hinn 19. júní.

Dagur B. Eggertsson oddviti Samfylkingarinnar segir tilhlökkunarefni fyrir alla aðila að setjast niður við að semja samstarfsyfirlýsingu fyrir nýjan meirihluta þessarra flokka.

„Viðreisn er að koma inn með nýja hluti og nýja fleti á viðfangsefnum sem við höfum verið að glíma við og það er jákvætt. En allir flokkarnir hafa auðvitað líka verið að vinna með sínu baklandi í aðdraganda kosninga og eru að setja fram ný og spennandi mál og koma inn með nýtt folk,” segir Dagur.

Oddvitarnir eru allir sammála um að málefnin ráði för og ekki verði rætt um einstök embætti fyrr en þau séu í höfn. Dagur hefur þó ekki farið leynt með að hann vilji gjarnan sitja áfram sem borgarstjóri.

„Ég hef auðvitað sett stefnuna á það. En núna setjumst við yfir málefnin og síðan ræðum við verkaskiptinguna. Ég er sannfærður um að við finnum niðurstöðu sem allir geta unað sáttir við,“ segir Dagur.

Viðreisn vill einfalda boðleiðir

Þórdís Lóa Þórhallsdóttir oddviti Viðreisnar segir menntamál verða fyrirferðarmikil í meirihlutasamningi.

„Við töluðum um að gera lífið einfaldara fyrir borgarbúa þegar kemur að þjónustu. Líka fyrir fyrirtækin. Okkur er það mjög umhugað að einfalda ferlið fyrir alla. Spara á því pening og tíma. Við munum alltaf huga að atvinnulífinu. Það eru lítil og meðalstór fyrirtæki sem skipta borgina verulegu máli. Nú erum við á ákveðnum stað í hagsveiflunni og við þurfum að vera tilbúin ef það breytist. Þannig að við verðum að hlúa að því líka,” segir Lóa.

Dóra Björt Guðjónsdóttir oddviti Pírata telur að með verðandi meirihluta komi ný nálgun á ýmis mál þótt flokkarnir séu nokkuð samstíga til að mynda í skipulags- og samgöngumálum.

„Það er mjög margt sem sameinar þessa flokka og þá sérstaklega okkur og Viðreisn hvað varðar frjálslynd gildi og að betrumbæta þjónustuna við borgarbúa. þannig að ég er rosalega vongóð um að þetta muni ganga vel og er spennt fyrir þessu. Ég held að við getum gert mjög góða hluti fyrir borgarbúa í sameiningu,” segir Dóra.

Líf Magneudóttir oddviti Vinstri grænna hefur fulla trú á farsælu samstarfi þessarra flokka.

„Landslagið eins og ég hef talað um, er fólkið. Þannig að við fórum öll inn í okkar bakland og heyrðum í fólki þar. Við mátum aðstæður svo að þetta gæti gengið upp. Þannig að það var ekki eitthvað eitt það var margt. Ég held að niðurstaða þessara kosninga séu með þeim hætti að hér þurfi félagshyggjuöfl að taka sig saman,” segir Líf.