Fjallaljón drap hjólreiðamann

Fjallaljón drap hjólreiðamann og særði annan alvarlega í Washington-ríki í Bandaríkjunum á laugardagsmorgun. Þjóðgarðsverðir leituðu ljónið uppi eftir árásina og skutu það til bana.

Hjólreiðamennirnir tveir voru á ferð við bæinn North Bend, sem staðsettur er í um 50 kílómetra fjarlægð frá borginni Seattle, þegar fjallaljónið réðst á þá.

Fjallaljónið banaði öðrum manninum og dró hann með sér í greni sitt. Hinn maðurinn náði að hringja á hjálp.

Þefhundar voru notaðir til að rekja slóð fjallaljónsins en það fannst nokkrum klukkustundum eftir árásina og var, eins og áður sagði, skotið til bana.

Í frétt BBC kemur fram að um sé að ræða aðra banvænu árás fjallaljóns í Washington-ríki á síðustu 100 árum.