Úrhelli setur svip á kjördaginn

Kosningadagurinn heilsar með sunnan strekkingi og rigningu, og er von á henni í miklu magni um landið sunnan- og vestanvert. Þar er möguleiki á að vatnavextir verið til trafala.

Því hefur Veðurstofan virkjað gula viðvörun á öllu Vestur-, Suður- og Suðvesturlandi í dag. Búast má við því að flætt geti um götur ef ræsi og niðurföll eru ekki opin. Þá má jafnvel gera ráð fyrir skriðuföllum.

Mest úrkoma verður á vatnasviði Hvítár í Borgarfirði og Hvítár í Árnessýslu.

Einkum má búast við miklum staðbundnum vatnavöxtum undir Eyjafjöllum og í Þórsmörk. Á vef Veðurstofunnar segir jafnframt að úrkoman verði mikil við Jökulsá á Sólheimasandi og eru ferðamenn á því svæði beðnir um að sýna aðgát. Vatn gæti safnast upp meðfram vegum og því gæti flætt yfir þá, einkum á Mýrdalssandi til dæmis við Múlakvísl. Þar sem úrkoman er ónvenjulega mikil ættu ferðalangar að sýna ítrustu varúð á þessu svæði

Nítján stiga hiti

Þegar kemur fram á daginn dregur úr vindinum, en ekki rigningunni, „ef til vill má þá hafa gagn af regnhlíf (það er ekki algengt á Íslandi)“ eins og gamansamur veðurfræðingur orðar það.

Áttin verður svo suðaustlæg á morgun og vindhraði nær ekki yfir 10 m/s nema í algjörum undantekningartilfellum að sögn veðurfræðings. Von er á að tvö úrkomusvæði renni sér yfir landið, svo á hverjum stað má búast við tveimur köflum af ágætlega drjúgri rigninu. Minnsta rigningin á morgun verður, líkt og í dag, á Norðaustur- og Austurlandi og þar verður áfram hlýjast.

Hitinn verður á bilinu 7 til 10 stig í rigningunni í dag, en allt að 19 stig norðaustantil síðdegis.



Veðurhorfur á landinu næstu daga



Á sunnudag:

Suðaustan 5-10 m/s, en 8-13 syðst á landinu. Víða rigning, en þurrt að mestu norðaustan- og austanlands eftir hádegi. Hiti 6 til 12 stig, en allt að 18 stig á Austurlandi. 

Á mánudag:

Breytileg átt 3-10. Rigning um mestallt land um morguninn, en styttir síðan upp og skýjað með köflum og yfirleitt þurrt eftir hádegi. Hiti 10 til 19 stig, hlýjast á Austurlandi. 

Á þriðjudag:

Suðaustan 5-10 og rigning eða súld með köflum, hiti 8 til 13 stig. Bjartviðri norðaustantil á landinu og hiti 15 til 20 stig. 

Á miðvikudag, fimmtudag og föstudag:

Fremur hæg breytileg átt. Bjart á köflum og hlýtt, en sums staðar súld eða þokuloft, einkum við sjávarsíðuna og svalara veður.